Сәламәтлек мөмкинлекләре чикле балалар Чистайның янгын сүндерү бүлегендә экскурсиядә булдылар

Инвалид балалар тәрбияләүче гаиләләр гадәти булмаган һәм файдалы экскурсиядә катнаштылар. Чистай шәһәренең 67нче номерлы янгын сүндерү-коткару часте үз ишекләрен ачты.

Балалар һәм аларның ата-аналары өчен экскурсияне бүлек командиры прапорщик Дмитрий Балберов үткәрде. Ул кунакларга бүлекчә эше турында җентекләп сөйләде, техника һәм махсус җиһазларны, янгын сүндерү автомобильләрен һәм коткару җиһазларын күрсәтте.

Өлкән янгын сүндерүче Илгиз Рәшитов янгын сүндерүченең махсус киемнәрен оста итеп киеп күрсәтте. Балалар һәм өлкәннәр профессионалның һәр хәрәкәтен зур игътибар белән күзәттеләр.

Оештыручылар билгеләп үткәнчә, янгын сүндерү-коткару бүлегенә экскурсия – ул балаларга янгын сүндерүче һөнәренең мөһимлеге һәм каһарманлыгы турында сөйләү генә түгел, ә аларны көнкүрештә куркынычсызлык кагыйдәләренә өйрәтүнең бик яхшы ысулы да.

Балалар янгын сүндерү машиналарын кызыксынып карадылар, күпсанлы сораулар бирделәр һәм җавапларны игътибар белән тыңладылар. Очрашуның кульминациясе чын янгын сүндерү машинасында утырырга һәм истәлекле фотосурәтләр ясарга рөхсәт булды.