Шәһәрнең үзәк мәйданында эскәмияне ватканнар, агачны сындырганнар

Иртә белән чистайлыларны күңелсез күренеш көтте: мәйдандагы эскәмияләр урыннарыннан кузгатылган, яшь агач сынган.
— Бүген иртәбез шулай башланды: шәһәр үзәгендә эскәмияләрне ватканнар һәм агачларга зыян китергәннәр! Бик кызганыч, — дип уртаклашты үзенең социаль челтәрләрендә район башлыгы Дмитрий Иванов. — Безнең һәрберебез шуны истә тотарга тиеш: әйләнә-тирәбезне кайгырту — һәр гражданинның бурычы.
Дмитрий Алексеевичның бу сүзләренә шунда ук чистайлылар кушылды. Җирле халык аптырашта калган: «Сүз дә юк. Бик кызганыч», «Эскәмия кемгә комачаулады икән?», «Моны эшләгән кешедә башкаларга карата бернинди хөрмәт тә юк!», — дип яздылар чистайлылар.
Моны оештыручыда вөҗдан хисе уянганмы-юкмы — без белмибез. Әмма шунысы хак, мондый матурлыкны бозып, ул тирә-юньдәге кешеләр турында бөтенләй уйламаган. Ә бит бу күп кенә чистайлыларның яраткан урыны.
Чистай муниципалитетында булган мәгълүматларга караганда, үзәк мәйданда тәртипсезлек кылган кеше хокук саклау органнары хезмәткәрләре тарафыннан ачыкланган. Килеп чыккан хәлнең барлык шартлары ачыклана.