Рөстәм Миңнеханов татарстанлыларны Җиңү көне белән котлады

Ул билгеләп үткәнчә, бу бәйрәм күпмилләтле халыкның батырлыгын, бердәмлеген һәм какшамас ихтыярын гәүдәләндерә, һәркемнең тормышында аерым урын алып тора һәм иң дулкынландыргыч хисләр уята.

«Җиңү көне безгә ата-бабаларыбызга төшкән авыр сынауларны, батырларча Җиңү тарихын һәм рух көченең тантанасын искә төшерә. Без Ватан азатлыгын һәм бәйсезлеген тәвәккәл һәм фидакарь рәвештә яклаган җиңүчеләр буынына чиксез рәхмәтле», - диде Рөстәм Миңнеханов.

Ул ассызыклаганча, Бөек Ватан сугышы һәр гаиләдә тирән эз калдырган. Татарстаннан фронтка 700 мең кеше киткән, аларның күбесе өчен бу соңгы сынау булган. Республика уртак җиңүгә зур өлеш кертә: Казан заводлары сугыш техникасы чыгара, предприятиеләр фронтны корал һәм кием-салым, ә авыл хезмәтчәннәре азык-төлек белән тәэмин итә. Ул елларда бөтен ил бер максат  — җиңүне якынайту теләге белән яши.

Республика Рәисе сугыш турындагы тарихи хакыйкатьне саклау һәм батырлыклар турындагы истәлекне буыннан-буынга тапшыруның мөһимлеген искә төшерде. Ул билгеләп үткәнчә, Татарстан Республикасында Хәрби батырлык һәм хезмәт фидакарьлеге елы — фронтта һәм тылда Җиңүне якынайтучыларга тирән ихтирам белдерү, шулай ук әлеге вакыйгаларның хәзерге көндә яшәүче шаһитларын игътибар һәм кайгырту белән чолгап алу өчен сәбәп.

«Бүген Россия Федерациясе язмышы өчен җаваплылыкны, аның иминлеген һәм суверенитетын Ватанны саклаучыларның яңа буыннары үз өстенә алды. Махсус хәрби операциядә катнашучылар, ата-бабалары кебек үк, хәрби бурычларын намус белән үтиләр, югары профессионализм һәм чын патриотизм үрнәге күрсәтәләр. Бөтен республика, уртак максатка ирешү өчен берләшеп, безнең хәрбиләргә һәм аларның гаиләләренә ярдәм итә», - дип өстәде ул.

Ул ассызыклаганча, ил Президенты Владимир Путин игълан иткән Россия халыкларының бердәмлеге елы катлаулы чорда күпмилләтле җәмгыятьнең бердәм булуының мөһимлеген күрсәтә. Аның сүзләренә караганда, яңа җиңүнең нигезе нәкъ менә бердәмлектә һәм гражданлык татулыгында.

«Кадерле ветераннар! Без сезнең батырлыгыгыз белән горурланабыз һәм сокланабыз! Сезнең бурычка, Ватанга карата тугры булуыгыз, туган җиргә мәхәббәтегез – безнең төп әхлакый юнәлешебез. Сезнең йөрәкләрегез һәрвакыт якыннарыгызның җылысы һәм кайгыртуы белән җылынсын, ә тормышыгыз шатлык һәм күңел тынычлыгы белән тулсын. Барлык татарстанлыларга ныклы сәламәтлек, бәхет һәм иминлек телим! Бәйрәм белән! Бөек Җиңү көне белән!» — дип йомгаклады Рөстәм Миңнеханов.

Чыганак: Вести Татарстан