Росгвардия хезмәткәрләре тәртип һәм иминлек сагында торалар

Бүген Росгвардия хезмәткәрләре үзләренең һөнәри бәйрәмнәрен — Россия Федерациясе Милли гвардиясе гаскәрләре көнен билгеләп үтәчәкләр. Бу ведомство 9 ел элек төзелгән һәм үз составында СОБР, ОМОН, авиация, ведомстводан тыш сак, шулай ук Россия Эчке эшләр министрлыгының лицензия-рөхсәт бирү эше бүлекчәләрен берләштерә. Росгвардиянең территориаль идарәләре илнең барлык төбәкләрендә дә эшлиләр, иминлекне һәм хокук тәртибен тәэмин итәләр.
Татарстанда милли гвардия гаскәрләренә йөкләнгән бурычларны Росгвардия территориаль идарәсенең шәхси составы һәм Идел буе округының төбәктә урнашкан хәрби частьләре башкара. Ведомство хезмәткәрләре эре иҗтимагый, спорт, дини һәм мәдәни чаралар уздырганда җәмәгать тәртибен һәм иминлекне саклауны тәэмин итәләр.
Чистай районы буенча ведомстводан тыш сак бүлеге — Россия Милли гвардиясенең Татарстан Республикасы буенча ведомстводан тыш сак идарәсе филиалының узган елгы эшчәнлеге нәтиҗәләре турында ведомство җитәкчесе Юрий Беспалов хәбәр итте.
Чистайда 449 объект, шулай ук 479 фатир һәм гражданнарның мөлкәтен саклау урыннары ведомстводан тыш хезмәт сагында тора. Көн саен кизү торуга 2 мобиль тоткарлау төркеме чыга, алар заманча технологияләр һәм кулай маршрутлар ярдәмендә хәвефле сигналларга оператив җавап бирәләр.
— 2024 елда Росгвардиянең тоткарлау төркемнәре хәвеф сигналлары буенча 1515 тапкырдан һәм эчке эшләр органнарының кизү тору частьләре гаризалары буенча 295 тапкырдан артыграк чакыруларга чыктылар. Аларның эше нәтиҗәсендә 13 җинаять, шул исәптән урлашулар, талау һәм сәламәтлеккә аңлы рәвештә зыян китерү, шулай ук 34тән артык административ хокук бозу ачыкланды, — дип билгеләп үтте Юрий Петрович.
Ул билгеләп үткәнчә, соңгы елларда Чистайның ведомстводан тыш сак бүлеге төрле катлаулыктагы объектларның комплекслы иминлеген оештыруда шактый тәҗрибә туплаган. Заманча техник чаралар кертү һәм хезмәткәрләрнең квалификациясен күтәрү нәтиҗәсендә, саклана торган объектларда һәм фатирларда ун елдан артык инде урлашулар теркәлмәгән.
Татарстан Республикасы буенча Росгвардиянең ведомстводан тыш сак бүлеге хәбәр итүләрне тапшыруның автоматлаштырылган системаларын, күчмә объектларны саклау өчен мониторинг комплексларын һәм чыбыксыз сак сигнализацияләрен актив кертә.
— Үзәкләштерелгән сак пультлары компьютер системалары белән җиһазландырылган, алар хәвеф сигналлары килү вакытын автомат рәвештә теркәп бара һәм аларга оператив рәвештә җавап бирә. Объектларның иминлеген тәэмин итү өчен төрле типтагы хәбәрчеләр кулланыла, алар янгын вакытында, диварлар җимерелгәндә, пыяла ватылганда һәм башка экстремаль хәлләрдә эшли. Электр сүндерелгән очракта система аккумулятор батареяләреннән туклануга күчә, — дип аңлатты Юрий Беспалов.
Ул ассызыклаганча, саклана торган объектларда Росгвардиянең «Сак» фәнни-тикшеренү үзәгендә тест узган югары ышанычлы приборлар гына кулланыла. Хәвеф сигналы буенча урынга югары әзерлеккә һәм киң вәкаләтләргә ия булган кораллы һәм экипировкалы хезмәткәрләр тиз арада килә.
— Татарстанның уникаль, дөньяда тиңдәше булмаган дәүләт хезмәте — ведомстводан тыш сак бүлеге эшләү дәверендә халык арасында тотрыклы һәм уңай рейтингка ия булды, — дип йомгак ясады Юрий Петрович.
Һөнәри бәйрәм алдыннан Юрий Беспалов хезмәттәшләрен котлады:
— Якынлашып килүче Милли гвардия гаскәрләре оешу көне уңаеннан ведомстводан тыш сак хезмәткәрләрен һәм ветераннарын әлеге бәйрәм белән котлыйм. Сезгә хезмәтегездә уңышлар, нык сәламәтлек, гаиләләрегезгә иминлек һәм бәхет телим. Сезнең хезмәтегез һәм эшкә тугры булуыгыз тирән ихтирамга һәм рәхмәткә лаек!