«Рәхмәт сиңа, укытучым!»

Әй, мөгаллим, хезмәтеңә килә минем
Рәхмәт әйтеп, баш иясем.
Белмәгәнең юктыр синең бу дөньяда,
Горур йөрсен киләчәктә синең исем.

Кеше гомерен юкка гына аккан суга тиңләмиләр. Көн­дәлек тормышның борчу-мәшә­катьләре, шатлык-сөенеч­ләре белән көн артыннан көн үткәнен сизми дә кала адәм баласы.
Ләкин табигать күренеш­ләреннән аермалы буларак, кеше узган гомеренә борылып карый, үткән тормышын барлый, эш-гамәлләрен бәяли, хаталарын төзәтә ала. Шунысы белән бәхетле ул. Әлеге язмада шундый бәхетлеләрнең берсе Татар Сарсазы мәктәбенең математика укытучысы Алсу Азат кызы Галиева турында сөйләргә телибез.
Казан Дәүләт педагогия инс­титутын тәмамлап безнең авылның, ул вакытта сигезьеллык мәктәбенә эшкә кайтып урнашуына да 39 ел вакыт үткән. Бу еллар эчендә күпме борчу-шатлыклар, йокысыз төннәр һәм дәртләнеп эшкә барган иртәләр, укучылар белән бергә үткәргән бәйрәмнәр, тынгысыз ачык дәресләр, беренче җиңүләрнең ләззәтле күз яшьләре…
Шушы көннәрдә гомер бәй­рәмен — 60 яшьлек юбилеен билгеләп узучы Алсу Азат кызы гади укытучы гына түгел, ул инде мәктәп белән бергә, замана белән бергә атлап баручы чын татар хатыны. Көннән-көн балаларны тәрбияләү авырлашкан вакытта, аларның һәрберсенең күңеленә ачкыч табу зур осталык һәм көч сорый. Әмма безнең хезмәттәшебездә рухи көч кенә түгел, физик көч тә җитәрлек. Бар нәрсәгә дә өлгерә ул, хезмәт­тәшләренә ныклы таяныч, киңәшче һәм остаз да әле.
Гаиләсендә дә ныклы хатын-кыз ул. Тормыш йөген җигелеп тартудан бер дә авырсынмый. Вакыты белән яшелчә, җиләк-җимеш, чәчәк теплицаларының падишаһына әверелә, вакыты белән шул аллы-гөлле чәчкәләргә су сипкәндә, тирән уй-кичерешләргә бирелә. Хатын-кызга хас булган нәзәкать­лелекне, мөлаемлы­лыкны, сабырлыкны саклап калган олы йөрәкле гүзәл зат ул. Тормыш иптәше Марсель абый белән алтын баганага тиң өч егет үстерделәр, аларга югары белем биреп, олы тормыш юлына басарга күп көч куялар. Хәзергесе көндә, Аллаһка шөкер, аларның куанычларына шатланып яшиләр.
«Укытучы — оста артист, ләкин аңа кул чапмыйлар, ул оста скульптор, ләкин аны күрмиләр, ул яхшы табиб, ләкин аңа пациентлары бик сирәк кенә дәвалаган өчен рәхмәт әйтә, кайберләре, кайвакыт, сихәтләнергә дә теләми. Ә рухлану өчен кайдан көч алырга соң? Бары тик үзеңнән, үзеңнең хезмәтеңнең бөеклегеннән», — дигән сүзләрне әйтергә ярата педагог. Әйе, укучыларын шатландырып, аларны аңлап, ихласлыкларын сүндермичә, белемгә кызыксыну уятып, эшләргә дә әле эшләргә!

Киләчәктә тагын бик күп еллар
Бергә — бергә язсын эшләргә,
Насыйп булсын саулык, шатлык белән
Тормыш ямен тоеп яшәргә!

Иң изге теләкләр белән
Татар Сарсазы мәктәбе коллективы