Олы яшьтәгеләр күрсәтелгән игътибардан канәгать

Авыллардан әби-бабайлар расланган графиклар нигезендә медицина тикшерүе узар өчен Чистай үзәк район дәваханәсенә авырлыкларсыз барып җитә алалар. Аларга бу эштә авыл җирлекләре фельдшерлары бригадалары һәм «Балкыш» халыкка комплекслы социаль хезмәт күрсәтү үзәге белгечләре ярдәм итә.

Шәһәрдән ерак урнашкан авылларда беренчел ярдәм күрсәтү өчен билгеләнгән үз фельдшер-акушерлык пунктлары булуга карамастан, медицина оешмаларына җентекләбрәк тикшеренүләр һәм кирәкле скрининглар үтү өчен баруны кичектерергә ярамый. Моның өчен рейс автобуслары каралмаган һәм үзеңә барып җитәргә кирәк.

Әгәр яшьләр әлеге хәлдән чыгу юлын таба һәм шәһәр поликлиникасына кадәр, мәсәлән, үз машиналарында барып җитә алсалар, пенсионерларга мәсьәләне нәкъ менә шулай хәл итү авыррак.

2019 елның сентябреннән «Демография» милли проектының «Өлкән буын» федераль проекты кысаларында 65 яшьтән өлкәнрәк кешеләргә үзәк район дәваханәсенә барып җитәргә ярдәм итәләр. Билгеләнгән график буенча аларны «Балкыш» халыкка комплекслы социаль хезмәт күрсәтү үзәгенең автотранспортында медицина учреждениесенә бушлай алып барып кайталар.

— Проект өлкән яшьтәге кешеләрнең тормыш сыйфатын яхшыртуга һәм ерак авылларда яшәүче өлкән яшьтәге гражданнарның актив, озак яшәү чорын арттыруга, кирәкле медицина тикшеренүләрен һәм скринингларны вакытында үтә алуга шартлар тудыруга юнәлдерелгән. Илтеп җиткерүне оештыру авыл җирлекләре фельдшерлары һәм халыкка комплекслы социаль хезмәт күрсәтү үзәге белгечләре белән берлектә башкарыла, — дип билгеләп үтте өйдә социаль хезмәт күрсәтү бүлеге мөдире Резидә Хәлиуллина.
Медицина тикшеренүе узучы гражданнарга барысы да вакытында хәбәр ителә. Әлеге илкүләм проектта катнашучы әби-бабайлар үзләренә күрсәтелгән игътибардан бик канәгать, медицина учреждениесенә һәм анда алып баруны оештыручыларга рәхмәт сүзләрен белдерәләр.

Социаль хезмәтләр алучыларның берсе — 85 яшьлек Анна Ивановна, күпләр кебек үк, дәваханәгә еш йөрергә яратмый. Ләкин яше олы булганлыктан, медицина учреждениесенә барыбер мөрәҗәгать итәргә туры килә. Бу тикшеренү аның өчен бик тә урынлы, чөнки күптән түгел ул күзләренә операция кичергән, шуннан соң табибта даими күзәтү үтәргә кирәк.

— Минем өемә авыл фельдшеры килде һәм берничә көннән мине район поликлиникасына тикшерү узарга алып барачакларын әйтте, — дип уртаклаша безнең белән Анна Ивановна.

— Машина ишегалдына килеп туктады. Шофер шундый яхшы, миңа машинага утырырга ярдәм итте, чөнки моны үземә эшләү авыр, аякларым авырта. Безнең белән тагын өч авылдашым барды. Безне каршы алдылар, кабинетлар буенча йөрттеләр, тикшерделәр. Табиблар һәм шәфкать туташлары яхшы карадылар. Мин бик канәгать!
Бүгенге көндә 785 өлкән яшьтәге авыл кешесе шәһәрнең медицина учреждениеләрендә булган инде. Агымдагы елда авыл җирлегендә яшәүче 1246 пенсионерны колачлау планлаштырыла. Шунысын да билгеләп үтәргә кирәк, «Өлкән буын» проекты алдагы елларда да гамәлгә ашырылачак.