Никахлашу сараенда гаилә тормышы юбилярларын, күп балалы гаиләләрне һәм яшь парларны хөрмәтләделәр

Никахлашу сараеның тантаналар залында Гаилә бәйрәме узды. Анда ирле-хатынлы Гатауллиннар, Кудрявцевлар, күп балалы Тимофеевлар һәм Сәгъдиевлар гаиләләрен, Югары Ослан районыннан яшь пар Бурдиннар чакырылган иде.
Кунакларны ЗАГС бүлеге начальнигы Ильмира Ярмушева сәламләде. Барысын да шәһәр башлыгы урынбасары Михаил Ксенофонтов котлады.
— Кадерле яшьләр, беренче чиратта сезгә мөрәҗәгать итәсем килә. Бүген сезнең алда менә дигән гаиләләрнең берничә мисалы: ике күп балалы гаилә һәм ике пар алтын юбиляр тора. Алар барысы да бәхетле гаилә тормышы алып баралар. Сезгә, Илья һәм Вероника, озак еллар бергә тату яшәвегезне, барыгызга да зур мәхәббәт һәм гаилә иминлеге телим! — диде Михаил Иванович.
Бу үзенчәлекле көнне алтын юбилярлар кабат үзләренең гаилә кору вакытын искә төшерделәр. Алар, ярты гасыр элек кебек үк, бер-берсенә «Әйе!» — дип әйттеләр, юбилярларның Мактау китабына кул куйдылар һәм туй вальсын биеделәр. Аларның күзләрендә элеккечә наз һәм мәхәббәт уты яна, ә йөзләрендә елмаю балкый.

Ярты гасыр бергә
Тәслимә һәм Рафаэль Гатауллиннар тумышлары белән Мөслим авылыннан. Рафаэль Габидулла улы бөтен хезмәт елларын туган колхозына багышлаган, 32 ел баш инженер булып эшләгән. Аның танышлары әйтүенчә, ул «техниканы үзенең биш бармагы кебек белә». Тәслимә Мансур кызы авыл китапханәсендә эшләгән. Ул ягымлы елмаюы һәм киң күңеллелеге белән үзенә тарта.
Ирле-хатынлы Гатауллиннар уллары Равил һәм Радикны тәрбияләп үстергәннәр, алар туган авылларында укытучы булып эшлиләр. Юбилярлар күңел күтәренкелеге, тормыш белән кызыксынулары, бер-берсенә тугрылыклы һәм ихтирамлы булулары белән сокландыралар, хәзер инде оныкларының уңышларына сөенеп яшиләр.
Татьяна һәм Константин Кудрявцевлар 1974 елның сентябрендә өйләнешкәннәр. Ир белән хатын — хезмәт ияләре. Константин Петрович үз гомерен төзүче һөнәренә багышлаган, ә Татьяна Петровна сәгать заводында эшләгән.
Гаилә тормышы юбилярлары уллары Олег һәм Дмитрийны тәрбияләп үстергәннәр. Алар үз балаларына хезмәткә мәхәббәт тәрбияләгәннәр, өлкәннәрне хөрмәт итәргә һәм үз максатларына ирешергә өйрәткәннәр.
Хәзер бәхетле ир белән хатын балаларының һәм дүрт оныгының уңышларына сөенәләр, алар белән тормыш тәҗрибәләрен уртаклашалар, гаилә кичләрен бергә үткәрәләр.

Күп балалы гаиләләрне хөрмәтләделәр
Күп балалы Сәгъдиевлар гаиләсе Яңа Чишмә районыннан гаилә утын алып кайту хөрмәтенә ия булды. Айрат Мансур улы, гаилә башлыгы, Росгвардиядә хезмәт итә, ә аның хатыны Румия Җәвит кызы декрет ялында. Ир белән хатын 7 ел элек өйләнешкәннәр. Хәзер алар өч бала — Ләйлә, Булат һәм Моратның бәхетле әти-әнисе. Алар әти-әнисе, әби-бабалары үрнәгендә тәрбияләнәләр, әхлакый нигезләрне һәм милли гореф-гадәтләрне сеңдерергә тырышалар.
Күп балалы Тимофеевлар гаилә коруларына быел 15 ел тулуны билгеләп үттеләр. Гаилә башлыгы Игорь Николаевич Яшел Үзән сөт эшкәртү комбинатында эшли, ә Гөлназ Зәйнулла кызы 8нче балалар бакчасында тәрбияче. Танышуларының беренче көннәреннән үк алар бер-берсенә бер күрүдә гашыйк булуларын аңлыйлар. Гаиләдә өч бала: Эвелина, Данил һәм Денис үсә.

Гаилә учагы утын Югары Ослан районына тапшырдылар
Яшь пар Вероника һәм Илья Бурдиннарга бу бәйрәм икеләтә истә калачак. Тантанага алар Югары Ослан районыннан килгәннәр. Илья һәм Вероника күптән түгел генә — 13 сентябрьдә өйләнешкәннәр.
Алар мәктәптән үк таныш булганнар һәм бер ел элек аралашуны яңартканнар. Ул вакытта Илья Иннополис лицеенда физик культура укытучысы, Ә Вероника Ростехнадзорның Идел буе идарәсендә баш дәүләт инспекторы булып эшли. Хәзер Илья физик культура укытуын һәм балаларны өйрәтүен дәвам итә, ә Вероника төзелеш өлкәсендә әйдәп баручы инженер булып эшли.
Тимофеевлар гаиләсе яңа гаилә корган Бурдиннарга «Россия йөрәге» гаилә учагын тапшырды.
— Бер-берегезне яратып һәм аңлашып яшәгез, гаилә учагыгыз беркайчан да сүнмәсен! Ярдәмләшеп яшәгез, шул вакытта гаиләгез дә нык булачак, — дип Гөлназ һәм Игорь Тимофеевлар яшь парга үгет-нәсыйхәтләрен бирделәр.
Илья белән Вероникага бәхет елмайды, чөнки
нәкъ менә алар гаилә учагының бер өлешен Югары Ослан районына алып китәчәкләр.
Бәйрәмгә чакырылган гаиләләрнең барысына да күңелле бүләкләр тапшырылды. Ә Кристина Анисимова, Гөлнәзирә Сафиуллина һәм 1нче балалар бакчасында тәрбияләнүчеләр тантанада катнашучыларны музыкаль чыгышлары белән сөендерделәр.
— Гаилә — ул зур хезмәт, бер-береңне кайгырту. Гаилә кешене чын-чынлап бәхетле итә. Балаларның шат тавышлары өегезгә ямь өстәсен, ә туганнарыгыз сезгә ышанычлы таяныч булсын. Сезне мәхәббәт җылысы җылытсын. Һәр йортка иминлек, игелек, татулык телим! — диде чара азагында Ильмира Ярмушева.