Ни өчен Дәүләт хезмәтләре порталында күчемсез милек турында мәгълүматлар булмаска да мөмкин?

Хәзерге вакытта Татарстанда милеккә салым түләү буенча кампания бара. Аны түләү вакыты 2024 елның 2 декабрендә тәмамлана. Шул ук вакытта салым түләүчеләрдә түбәндәге сораулар да туа: ни өчен салым квитанциясендә мөлкәт (фатир, җир кишәрлеге һ.б.) турында мәгълүмат бар, ә Дәүләт хезмәтләре порталында шәхси кабинетта юк? Яки киресенчә: ни өчен милек бар, ә салым хәбәрнамәсендә һәм Дәүләт хезмәтләре порталында мәгълүматлар юк?
Бу ни өчен шулай килеп чыга һәм хәлне ничек төзәтергә кирәклеге турында Татарстан Росреестры җитәкчесе урынбасары Лилия Борһанова аңлата:
— Әгәр күчемсез милек объекты Дәүләт хезмәтләрендә күрсәтелмәсә, бу хокук иясендә һәрвакыт сораулар тудыра. Ләкин паникага бирелергә кирәкми. Әлеге порталда күчемсез милеккә хокук турындагы мәгълүматлар булмавының берничә сәбәбе бар.
Беренче сәбәп: сез әле генә Росреестрда милек хокукын теркәгәнсез һәм мәгълүматлар әле кертелмәгән, Дәүләт хезмәтләре порталында чагылырга өлгермәгән. Биредә әлеге мәгълүматлар сайтта пәйда булганчы беркадәр вакыт көтәргә кирәк.
Икенче сәбәп: күчемсез милек объекты 2000 елның 1 гыйнварына кадәр сатып алынган (хокук элек барлыкка килгән, БТИда теркәлгән) һәм хокук иясе турында белешмәләр Бердәм дәүләт күчемсез милек реестрында юк, чөнки теркәлү тәртибе мөрәҗәгать итү характерына ия. Бу очракта хуҗага, объектка хокук билгели торган документны һәм СНИЛСны теркәп, милек хокукын дәүләт теркәвенә алу турында Росреестрга гариза бирергә кирәк. Бу вакытта дәүләт пошлинасы алынмый.
Өченче сәбәп: дәүләт хезмәтләре порталындагы гражданин профилендәге мәгълүматларның Бердәм дәүләт күчемсез милек реестрындагы мәгълүматлар белән туры килмәве (мәсәлән, Бердәм дәүләт күчемсез милек реестры язмасында хокук иясенең СНИЛСы юк яки хокук иясе фамилиясен, паспортын алыштырган, әмма Бердәм дәүләт күчемсез милек реестрына үзгәрешләр кертмәгән). Бу очракта Бердәм дәүләт күчемсез милек реестрына хокук иясе турында белешмәләр өлешендә үзгәрешләр кертү турында гариза бирергә кирәк (СНИЛС яки яңа паспорт мәгълүматларын күрсәтергә). Бу хезмәт шулай ук түләүсез.
Дүртенче сәбәп: Бердәм дәүләт күчемсез милек реестры мәгълүматларында техник хата. Аны төзәтү өчен гаризаны күп функцияле үзәк аша, Бердәм дәүләт хезмәтләре порталында, яки Росреестр сайтында бирергә кирәк. Теркәүчеләр хатаны 3-5 көн эчендә төзәтәчәк, ә шәхси кабинеттагы мәгълүматлар автомат рәвештә яңартылачак.
Бердәм дәүләт күчемсез милек реестрында объект турында белешмәләрнең булуын Росреестрның «Онлайн режимда күчемсез милек объектлары буенча белешмә мәгълүмат» сервисы ярдәмендә тикшерергә (хезмәт бушлай күрсәтелә), яки Дәүләт хезмәтләре порталында күчемсез милек объекты турында Бердәм дәүләт күчемсез милек реестрыннан өземтәне «Бердәм дәүләт күчемсез милек реестрында өземтәләр/белешмәләр» бүлегендә соратып алырга мөмкин. Шул ук вакытта объектның хокук иясе Дәүләт хезмәтләре порталында Бердәм дәүләт күчемсез милек реестрында онлайн-өземтәне расланган хисап язмасы булганда гына алырга мөмкин.
Матбугат хезмәте