Мөлкәткә салымны 1 декабрьгә кадәр түләргә кирәк

Татарстанда милек салымнарын, шулай ук 2021 ел өчен физик затлар кеременә салым түләү зарурлыгы турында хәбәрнамәләр җибәрү дәвам итә. Әлеге актуаль темага без Татарстан Республикасы буенча 12нче номерлы Федераль салым хезмәтенең районара инспекциясе башлыгы урынбасары Евгений Суслов белән сөйләшәбез.

– Ни өчен берәүләргә хәбәрнамәләр почта аша заказлы хат белән килә, ә башкаларга юк?

– Бу салым түләүченең Федераль салым хезмәте сайтында «Шәхси кабинеты» булу-булмауга бәйле. «Шәхси кабинет»тан файдаланучыларга электрон рәвештә салым хәбәрнамәләре җибәрелде инде. Бүген «Шәхси кабинет» ачып та, электрон хәбәрнамә алырга мөмкин. Сезгә электрон хәбәрнамә җибәрелгәнме-юкмы икәнен тикшерү өчен, үзегезнең «Шәхси кабинеты»гызга логин/пароль яки Дәүләт һәм муниципаль хезмәтләрнең бердәм порталы ярдәмендә керергә кирәк. Калган салым түләүчеләргә салым хәбәрнамәләре Россия почтасы тарафыннан китереләчәк.

– Нинди очракларда салым түләүчеләргә хәбәрнамәләр бөтенләй җибәрелми?

– Әгәр кешенең салым ташламасы, чигерүе яки законнар белән билгеләнгән башка нигезләре бар икән, ул салымнан тулысынча азат ителә. Тагын бер нигез – милек салымнары һәм НДФЛ буенча артык түләгән очракта һәм ул 2021 ел өчен исәпләнгән салымнарның гомуми суммасыннан артып китсә, шулай ук хәбәрнамә нигезендә физик зат түләргә тиеш булган салымнарның гомуми суммасы 100 сумнан кимрәк булса. Мондый хәбәрнамәне агымдагы календарь ел үткәннән соң салым салучылар анда күрсәтелгән бурычны түләттерү мөмкинлеген югалткан очракта гына җибәрәчәкләр.

– Салым түләүче кайчанга кадәр хәбәрнамә алырга тиеш?

– Әгәр 2021 ел өчен милек салымнарын түләүгә салым хәбәрнамәсе 1 ноябрьгә кадәр килмәсә, салым түләүче бу хакта салым органына хәбәр итәргә тиеш. Моны турыдан-туры инспекциягә мөрәҗәгать итеп, шәхси кабинет яки «Россия Федераль салым хезмәтенә мөрәҗәгать итәргә» сервисы аша эшләргә мөмкин. Салым хәбәрнамәләре буенча туган сорауларга җавап алырга «Салым хәбәрнамәләре 2022» промо-бит ярдәм итәчәк. Бүлектә торак, җир һәм транспорт хуҗалары тарафыннан салым түләү белән бәйле тормыш хәлләре буенча җаваплар табарга мөмкин.

– Ата-аналар үз «Шәхси кабинет»лары аша балалары өчен салым түли аламы?

– Әгәр балигъ булмаган балаларның салым салынырга тиешле милеге булса, бу очракта, законлы вәкил буларак, ата-аналар салым түләү бурычын башкара. Шуңа күрә балаларының салымын түләү өчен Россия Федераль салым хезмәтенең Татарстан буенча идарәсе республика халкына баланы «Шәхси кабинетка» тоташтырырга киңәш итә. Хәзер ата-ана «Шәхси кабинеты»нда балалары өчен салым түли ала. «Салымнар» бүлегендә исемлек барлыкка килде, анда сез үз балигъ булмаган балагызны кертә аласыз. Бу исемлектә кулланучыларны күчереп, салымны теләсә нинди уңайлы ысул: банк картасы, онлайн банк аша яки квитанцияне бастырып түләргә мөмкин.

– Барысын да җентекләп аңлатканыгыз өчен рәхмәт.

Белешмә

Баланы ата-ананың «Шәхси кабинеты»на беркетү өчен, түбәндәгеләрне үтәргә кирәк:

1. Балага «Шәхси кабинет» ачарга. Моның өчен теләсә кайсы салым органына паспорт һәм бала туу турындагы таныклык белән, законлы вәкил вәкаләтләрен раслап, мөрәҗәгать итәргә мөмкин.

2. Ата-ананың «Шәхси кабинеты»нда «Профиль» бүлегенең «Гаилә мөмкинлеге» кушымтасында кулланучыны – баланың «Шәхси кабинеты»на соратып алу җибәреп, балигъ булмаган баланы өстәргә мөмкин.

3. Баланың «Шәхси кабинеты»на кереп, җибәрелгән соратып алуны тиешле төймәгә басып расларга.