«Мәхәббәт һәм татулык» бакчасында мемориаль зона барлыкка киләчәк

ТҖС тарафыннан эшләнгән «Синең исемең белән» проекты Татарстанда әлеге компаниянең XI социаль һәм мәдәни проектлары конкурсында җиңүчеләрнең берсе булды. Аны язын гамәлгә ашыра башларга планлаштыралар. «Мебель фабрикасы» ТҖС җитәкчесе Мария Есипова проектны тормышка ашыру буенча булачак чаралар планы турында фикер алышу өчен очрашу оештырды. Анда җирле депутатлар, китапханә, музей-тыюлык хезмәткәрләре, микрорайонның актив кешеләре катнашты.

– «Синең исемең белән» проекты Мебель фабрикасы микрорайоны урамнары барлыкка килү тарихына багышланган, алар  бездә 38әү, шуларның 30ы танылган кешеләр, мәсәлән, Менделеев, Крылов, Ибраһимов, Кошевой хөрмәтенә аталган. Шулай ук Лесозаводская, Мебель, Тынычлык һәм башка урамнар да бар. Сүз дә юк, бу исемнәр аларга юкка гына бирелмәгән, һәрберсенең үз тарихы бар. Ел дәвамында без мәктәп, китапханә һәм микрорайонның актив кешеләре белән бергә урамнарга багышланган төрле чаралар үткәрергә планлаштырабыз, – дип билгеләп үтте Мария Михайловна.

Грант акчаларының зур өлешен «Синең исемең белән» мемориаль зона булдыруга юнәлдерү планлаштырыла. Махсус мәгълүмат стендын «Мәхәббәт һәм татулык» бакчасында урнаштыру планлаштырыла. Ул күптән микрорайонның йөрәге һәм төрле яшьтәге кешеләрне үзенә тартып тору урыны буларак билгеле.

 – Стенд – ул безнең микрорайон урамнары исемен йөртүче, Чистайны данлаган кешеләр турындагы истәлекне мәңгеләштерү. Болар – Чекин, Гыймаев, Крестников, Костин, Вотяков, Нуруллин, Орлов, Стекольщиков урамнары. Алар турында мәгълүматны без стендка урнаштырырга телибез, ул чакта теләсә һәр кеше үзенең күренекле якташлары турында укып белә алачак. «Синең исемең белән» проекты патриотик характерга да ия, әхлакый һәм агарту аспектларын да үз эченә ала, – дип ассызыклады Мария Есипова.

Очрашу барышында стендны бизәкләү вариантлары, проектны гамәлгә ашыру кысаларында чараларның характеры һәм үткәрү формасы турында фикер алыштылар.