«Мин машина йөртүче булачакмын, мине өйрәтсеннәр генә»

Аларда 30 студент һәм мәктәп укучысы белем алды.

Биредә барысы да чын автомәктәптәге кебек: юл хәрәкәте кагыйдәләрен, автомобиль төзелешен, иминлек теориясен һәм машина йөртергә өйрәтәләр. Моны булачак машина йөртүчеләрне яхшы әзерләү дип тә атарга була.

Исегезгә төшерәбез, проект Татарстан Икътисад министрлыгы һәм коммерцияви булмаган оешмалар конкурсында җиңүче булды. Ул 14 яшьтән 18 яшькә кадәрге өлкән сыйныф укучылары һәм студентлар өчен билгеләнгән иде.

Ниһаять, белем бирү курсының чыгарылыш укучылары өчен йомгаклау дәресе үткәрделәр, анда алар юл хәрәкәте иминлеге буенча сорауларга җавап бирделәр. Ярты ел дәвамында егетләр машина йөртү күнекмәләрен, автомобильнең двигателен көйләү нечкәлекләрен өйрәнделәр, слесарь инструментларыннан файдаландылар һәм хәтта төрле металл эшкәртү станокларында эшне үзләштерделәр, юл хәрәкәте иминлеге кагыйдәләрен өйрәнделәр.

– Без укучылар белән атнага ике тапкыр җыелдык, ягъни егетләр буш вакытларында килеп, аны файдалы үткәрделәр. Без транспорт чарасын амортизацияләүне өйрәндек, клапанны җыйдык, сүттек, көйләдек. Машина йөртү ДОСААФ автомәктәбе мәйданчыгында узды. Укучылар яшь булу сәбәпле, дәресләрне бернинди әзерлеге булмаган аудитория белән башлау авыр булды, һәркемгә якын килергә кирәк иде. Әмма кечкенә адымнар белән без проектның максатларына ирештек. Хәзер укучылар автомәктәптә үз белемнәрен ышанычлы күрсәтә алалар, инструкторларга алар белән эшләү җиңелрәк булачак, – ди курслар укытучысы Андрей Проснев.

Иң катлаулысы – юл хәрәкәте кагыйдәләрен истә калдыру, диләр егетләр. Данил Устинов автомәктәпкә агымдагы елның сентябрендә барырга планлаштыра. Белем бирү курсларына ул машина йөртү тәҗрибәсе бөтенләй булмаган килеш килгән. Хәзер ул автомобильнең техник торышы белән бәйле проблемаларны ничек хәл итәргә кирәклеген белә. Әмма машина йөртү хокукы әлегә булмау сәбәпле, шәһәр юлларына чыкмаган, үз күнекмәләрен махсус мәйданчыкта шомарткан.

– Ир-егет автомобиль тәгәрмәчләрен һәм майны алыштыра белергә тиеш. Безне биредә моңа өйрәттеләр. Двигательнең төзелешен өйрәнү кызык иде. Кемгәдер бу җиңел тоелды, ә кемгәдер авыр бирелде. Практик дәресләр дә бик ошады. Хәзер мин машина йөртергә теләвемне төгәл беләм, моңа омтылачакмын, – дип безнең белән уртаклаша Данил Устинов.

Ә менә Кирилл Ушенкин машина йөртү таныклыгын алган инде. Курсларга килгәч, автомәктәптә укырга теләвен аңлаган, өстәвенә, яше дә мөмкинлек бирә. Егет авыл хуҗалыгы техникумы студенты.

– Әлеге проект егетләр арасында иң активларын сайлап алырга мөмкинлек бирде. Алар үзләрен тәртипле машина йөртүчеләр буларак кына түгел, ә белемле җәяүлеләр буларак та күрсәтә алалар. Бу белемнәрнең армиядә дә кирәге чыгачак, өстәвенә, «С» категорияле машина йөртүчегә уку аларга күпкә җиңелрәк булачак, – дип аңлата укыту бүлеге мөдире Лилия Бешенова.

ДОСААФның техник мәктәбендә сөйләүләренчә, грант кысаларында әлеге проектны гамәлгә ашыру тәмамланган. Беренче төркем укуын төгәлләде. Егетләрнең бу курсларда алган белемнәре аларга киләчәктә дә кирәк булыр дип ышанабыз.