Медицина кадрлары, чәчүлекләрнең структурасы һәм кар: Чистай муниципалитетында узган киңәшмәдә шул хакта сөйләштеләр

Барлык чыгарылыш студентлары аттестацияне уңышлы үткәннәр һәм эшкә урнашканнар

Чистай медицина училищесы эше турында аның директоры Наилә Лазарева сөйләде. Уку йорты 1932 елда ачылган. Ул эшләгән елларда биредә 16 меңнән артык белгеч әзерләнгән. Хәзерге вакытта училище ике белгечлек: «Шәфкать туташы эше» һәм «Дәвалау эше» буенча әзерлек алып бара. Анда 9нчы сыйныфтан соң да, 11нче сыйныфтан соң да укырга керергә мөмкин. Уку йортына кабул итү аттестатның уртача баллы, керү сынаулары һәм тест үткәрү нигезендә алып барыла. Кабул итү планы тулы күләмдә башкарыла. Бюджет нигезендә белем алучылар белән белгечләрне һөнәри әзерләү һәм эшкә урнаштыру турында дүрт яклы килешүләр төзелә. Алар республиканың медицина оешмаларында мәҗбүри рәвештә 3 ел эшләүне күздә тота. Узган елда училищены 50 студент тәмамлаган, барысы да дәүләт йомгаклау аттестациясен уңышлы үткәннәр.

Моннан тыш, училищеда урта звено белгечләре квалификацияне күтәрү, яңадан һөнәри әзерлек узалар. Шулай, 2025 елда Чистай һәм Кама аръягы районнарыннан 634 медицина хезмәткәре укыту узган.

Студентларның уңышлары – көчле укытучылар составының казанышы. Училищеда 14 штат укытучы эшли, барысы да югары белемле. Аларның тугызында югары квалификация категориясе бар. Коллективның югары профессиональлеге бүләкләр белән билгеләп үтелгән: 11 педагог РФ һәм Татарстанның профильле министрлыкларының бүләкләренә лаек булган. Училищеда ике РФ сәламәтлек саклау отличнигы, ТРның атказанган укытучысы һәм ТРның атказанган табибы эшли.

Укытучылар һәм студентлар уку процессы белән генә чикләнмиләр. Алар конференцияләрдә һәм һөнәри конкурсларда актив катнашалар, даими рәвештә призлы урыннар яулыйлар, шулай ук шәһәрнең иҗтимагый тормышына зур өлеш кертәләр.

Наилә Сәйфулла кызының чыгышын тыңлап, Эдуард Хәсәнов башкарылган эш өчен рәхмәт белдерде һәм алга таба да һөнәри уңышлар теләде.

Чәчү мәйданнарының структурасы расланды

Агросәнәгать комплексындагы эшләрнең торышы турында авыл хуҗалыгы һәм азык-төлек идарәсе башлыгы Александр Ромадановский хәбәр итте. Узган атнада район хуҗалыкларында 440 тонна сөт җитештерелгән, бу аннан алдагы атна күрсәткеченнән 2 тоннага артыграк. 14 миллион сумнан артык суммага 417 тонна продукция сатылган. Сөтнең уртача бәясе узган атна дәрәҗәсендә калган һәм бер килограмм өчен 34 сум 40 тиен тәшкил иткән.

Бер үк вакытта хуҗалыкларда баш санын арттыру буенча эш алып барыла – бер атна эчендә 39 бозау туган.

Район хуҗалыкларында язгы кыр эшләренә әзерлек дәвам итә. Узган атнада хуҗалыкларның эш планнарын кабул итү тәмамланды, чәчү мәйданнарының структурасы расланды. Быел барлыгы 87 мең гектардан артык чәчү планлаштырыла. Төп күләм бөртекле һәм бөртекле-кузаклы культураларга туры килә – алар өчен 50 мең гектардан артык мәйдан бүлеп бирелгән. Сабан культуралары мәйданнарының бераз кимүе күзәтелә. Техник культуралар 25 мең гектардан артык мәйданны биләячәк. Бәрәңге һәм яшелчәләр өчен ике меңнән артык гектар бүлеп бирелгән. Шулай ук хуҗалыклар планында 1200 гектар мәйданда күпьеллык үләннәрне яңарту.

Сводкада – ялган билгеләре булган машина йөртү таныклыгын куллану очрагы

Оператив мәгълүматны Россия Эчке эшләр министрлыгының Чистай районы буенча бүлеге полиция башлыгы Сергей Атуров тәкъдим итте. Хисап атнасында район территориясендә җинаятьләр турында 14 хәбәр теркәлгән. Сводкада – сугыш кирәк-яраклары һәм корал тартып алуның – 2 очрагы, үтерү белән янау, административ күзәтүдән качу, сәламәтлеккә җиңелчә зыян китерү, 4 урлашу, шул исәптән банк картасыннан урлауның бер очрагы, 2 мошенниклык, ялган машина йөртү таныклыгын саклау һәм куллану очраклары теркәлгән.

Юлларда 19 юл-транспорт вакыйгасы килеп чыккан. ЮХИДИ хезмәткәрләре тарафыннан 112 юл хәрәкәте кагыйдәләрен бозучы җаваплылыкка тартылган, шул ук вакытта 3 машина йөртүче исерек килеш идарә иткән өчен тоткарланган. Бер атна эчендә 136 кеше административ җаваплылыкка тартылган.

Шәһәрнең барлык хатын-кызлары өчен концерт узачак

Утырышка йомгак ясап, Эдуард Хәсәнов атнага берничә бурыч куйды. Аларның иң мөһиме – шәһәр түбәләрен һәм урамнарын кардан һәм боздан чистартуга контрольне көчәйтү.

Киңәшмә бәйрәм нотасында тәмамланды: район башкарма комитеты җитәкчесе хатын-кызларны 8 Март бәйрәме белән котлады һәм шәһәр предприятиеләре һәм оешмалары җитәкчеләрен һәм коллективларын 5 мартта, 15 сәгатьтә, «Чистай» мәдәни үзәгендә узачак концертка чакырды.