Изге эшкә өлеш кертик

Изге Рамазан аеның соңгы көннәре бара. Ай буе мәчетләребездә аерым бер җанлылык хөкем сөрә, ифтар ашлары уздырыла, тәравих намазлары укыла. Озакламый яңа микрорайонда төзелүче мәчетебез дә шундый рәхәт мохитка чумар иншАллаһ. Әлегә анда төзелеш эшләре гөрли.
Озак еллар шәһәребезнең яңа микрорайонында мәчет булмау күпләрне борчып килде. Шуңа күрә дә 2021 елда «Фатиха» мәчете төзелә башлау биредә яшәүчеләр өчен зур шатлык булды.
Хәзер исә Казан ягыннан кайтучыларны әллә каян балкып торучы «Фатиха» мәчете каршы ала. Ике манаралы, 1086 квадрат метр мәйданны биләгән әлеге мәчеттә төп эшләр башкарылган дисәң дә була. Суы, уты кергән. Соңгы технологияләр кулланылып, төтен суырту, су суырту системалары көйләнгән. Шулай ук биредә душлар, җылы идәннәр булачак. Хәзер эчке эшләр бара. Эшчеләр астагы катта сылау, тигезләү эшләрен башкаралар, тәһарәтханәләргә плитәләр җәяләр.

— Мәчет территориясендә 800 квадрат метр мәйдан биләгән ашханә төзү дә күздә тотыла. Анда төрле хәләл мәҗлесләр үткәрергә, гаиләләр белән ял итәргә дә мөмкин булачак. Әлегә аның фундаментын салу планлаштырыла. Фундамент салгач, мәчет территориясен төзекләндерү эшләренә керешәчәкбез. Спорт мәйданчыгы, ял итү паркы ясау турында да хыялланабыз, — дип киләчәккә планнары белән уртаклашты мәчетнең имам-хатыйбы Рәдиф хәзрәт Фәттахов.

Яңа микрорайонда яшәүчеләр тизрәк азан тавышы яңгыравын, мәчетнең ачылуын көтәләр. Әмма, яшерен-батырын түгел, алда торган эшләрне башкарып чыгу өчен финанс ярдәме кирәк. Бу урында Пәйгамбәребезнең бер хәдисен искә төшерәсе килә. Анда «Кешеләр сәдаканы биргәндә сәдака үзенең хуҗасына: элек син миңа вакытлыча гына хуҗа идең, хәзер инде мин сиңа әҗер-савап булырмын, ул инде мәңгелек, дияр» дигән сүзләр бар. Шуңа күрә әлеге изге Рамазан аенда да, башка айларда да сәдакалар биреп, изге эшкә үзебездән дә өлеш кертергә насыйп булсын.
Форсаттан файдаланып, Рәдиф хәзрәт Фәттахов барлык дин кардәшләребезне Ураза бәйрәме белән тәбрик итте.
— Киләсе Ураза гаетен яңа мәчетебездә каршы алырга насыйп итсен Раббым. Барыгызга да ныклы сәламәтлек, күңел тынычлыгы, гаилә бәхете телим, — дип изге теләкләрен дә җиткерде ул.

Ярдәмне мәчетнең үзенә китерергә, шулай ук 8-937-281-36-56 номеры буенча сбербанк картасына (Гөлнара Рәисовна М.) күчерергә мөмкин. «Яңа мәчеткә» дигән билге куярга онытмагыз.