Юл хуҗалыгы хезмәткәрләре көне белән тәбрик итәм!

Бу бик катлаулы һәм күп көч таләп итә торган хезмәт, ул күбрәк сезонлыдыр: җәен — юлларны төзү, ә кышын — карап тоту. Әмма алар башкарган эш нәтиҗәсе буенча без барыбыз да көн саен йөрибез. Һәркем — олысы да, кечесе дә бу авыр хезмәт ияләренә рәхмәтле булырга тиеш.
Дәүләт автоинспекциясендә юл хәрәкәтен оештыру буенча инженер булып күп еллар эшләгәннән соң, мин юллар төзелешенә һәм аларны карап тотуга профессиональ бәя бирә, чагыштыра алам һәм мин юллар торышына битараф түгелмен.
Күпьеллык дустым — Россия­нең атказанган төзүчесе һәм мактаулы юл төзүчесе, «Алексеевскдорстрой» ААҖ директорлар советы рәисе Фоат Вәли улы Вәлиевны да котлыйсым килә. Ул бүгенге көндә, һичшиксез, Татарстан Респуб­ликасында үз тармагында иң яхшы һәм Россиядә лаеклы предприятиеләрнең берсен булдырган менә дигән оештыручы. Ул талантлы белгечләрне, тугрылыклы хезмәткәрләрне, оештыручыларны җәлеп итә алды, алар эшләрен уңышлы башкаралар һәм лаеклы хезмәт хакы, социаль пакет алалар.
Мин аның предприятиесендә хезмәт итүчеләр белән аралаштым һәм аны продукция сыйфаты өчен җавап бирүче, үз коллективының кайгыртучан атасы буларак чиксез хөрмәт итүләрен аңладым. Ул үзен башкалардан өстен куймыйча, вазифасын намус белән башкаручы җитәкче.
«Алексеевскдорстрой»да, күрәсең, коллективның бердәм­легенә ирешү максаты куелган: аларның диспетчерлык хезмәте бик көчле, алар тәүлек буе хезмәт итәләр, механизаторлар, машина йөртүчеләр, машиналар өзлексез эшлиләр. Һава шартлары нинди булуга карамастан, боларның барысын да тәэмин итәргә, ташу, ремонт эшләрен оештырырга кирәк. Юлда, бигрәк тә кышкы чорда, менә шулай эшләргә кирәк. Үземнең дә чистартылмаган юллар аркасында барлыкка килгән бөкеләрне җайга салганым, кар көртләрендә туңарга мөмкин булган кешеләрне коткарганым булды. Безнең климат шартлары нык үзгәрмәсә дә, юл хәрәкәте интенсивлыгы күпкә арткан булса да, «Алексеевскдорстрой» моңа юл куймый. Бу предприятиегә һәм аның җитәкчеләренә карата хөрмәт уята.
Фоат Вәли улы Чистай шәһәре һәм районы кешеләре өчен бик күп эшләр башкара. Булдырь авылында чиркәү салу эше белән йөргәндә, без бер бәйрәмгә гыйбадәт кылуны планлаштырдык. Гыйбадәтханә әле юк иде, территория төзеклән­дерелмәгән, пычрак. Мин Алексеевск поселогына Фоат Вәли улына кунакка кердем һәм берничә машина вак таш сорадым. Ул минем үтенечемне сүзсез генә кабул итте. Мин китеп бардым, Чис­тайда әти-әни янында бераз булдым да, Булдырьга кайттым, анда вак таш төялгән өч «КамАЗ» басып тора иде инде. Мондый мисалларны шактый китерергә мөмкин. Мин аны акыллы, ярдәмчел һәм намуслы кеше буларак беләм! Юл хезмәткәрләре көне белән!

Хөрмәт белән, Олег Николаевич Маркин