Юл хәрәкәте иминлеген тәэмин итү буенча район комиссиясе утырышында юл-транспорт вакыйгалары статистикасы һәм сәбәпләре турында сөйләштеләр

Утырышта Татарстан Республикасы буенча ЮХИДИ идарәсенең техник күзәтчелек һәм теркәү-имтихан эше бүлеге башлыгы урынбасары Артем Корнилов, юл хәрәкәте иминлеген тәэмин итү комиссиясе әгъзалары, шәһәр прокуроры, авыл җирлекләре башлыклары, мәгариф учреждениеләре, бердәм кизү диспетчерлык хезмәте вәкилләре, муниципальара ташучылар катнашты.
Эдуард Хәсәнов утырышны күңелсез статистикадан башлады.
— Бу елның 8 аенда район юлларында 41 юл-транспорт вакыйгасы теркәлгән, аларда 61 кеше зыян күргән, 6 кеше һәлак булган. Ни кызганыч, балалар һәм яшүсмерләр катнашында юл-транспорт вакыйгалары саны арткан. Агымдагы елның 8 аенда 10 юл-транспорт вакыйгасы килеп чыккан, аларда 13 кеше зыян күргән. 2023 елның шул ук чорында балигъ булмаганнар катнашында 8 юл-транспорт вакыйгасы килеп чыккан, аларда 9 бала зыян күргән, — диде Эдуард Рөстәм улы.
Утырышның көн тәртибенә куелган төп мәсьәләсе буенча фикер алышу барышында аварияләрнең төп сәбәпләре, алар еш була торган урыннар, вакыйгалар санын киметү өчен нинди чаралар күрергә кирәклеге турында анализланды. Ул 8 мәсьәләдән торды.
Агымдагы елның 8 аенда район юлларында авариялелекнең торышы һәм аны тотрыклыландыру чаралары турында Чистай районы буенча Дәүләт автоинспекциясе бүлеге начальнигы Илдар Вәлиуллин сөйләде.
Ул билгеләп үткәнчә, район юлларында юл-транспорт һәлакәтләре саны 8 очракка һәм зыян күрүчеләр саны 9 кешегә кимегән, һәлак булучылар саны узган ел дәрәҗәсендә калган.
— Юл-транспорт вакыйгаларының төп сәбәпләре — юл хәрәкәте кагыйдәләрен аңлы рәвештә тупас бозу, тизлек режимын, юл чатларын узу тәртибен үтәмәү, каршы як полосасына чыгу, — диде Илдар Илфар улы.
Доклад ясаучы сүзләренә караганда, юл-транспорт вакыйгаларының гомуми саныннан 50 проценты — транспорт чараларының бәрелешүе. Шулай ук 11 юл кырыена төшү һәм җәяүлеләрне бәрдерүнең 7 очрагы теркәлгән.
— Иң катлаулы вәзгыять торак пунктлардан тыш автомобиль юлларында килеп чыга, анда һәлак булучылар белән биш юл-транспорт вакыйгасы теркәлгән. Шәһәрдә зыян күрүчеләр белән юл-транспорт вакыйгаларының иң күп саны Карл Маркс һәм Ибраһимов урамнарында теркәлгән. Энгельс урамында 1958 елгы мотовелосипедчы һәлак булган, — дип хәбәр итте Дәүләт автоинспекциясе бүлеге башлыгы.
Илдар Илфар улы үз чыгышында балалар арасында юл-транспорт имгәнүләре мәсьәләләренә аерым игътибар бирде. Ни кызганыч, еш кына аварияләрдә пассажир, җәяүле һәм велосипедчы балалар катнаша.
— Квадроцикл, питбайк һәм башка мототехника йөртүче балалар катнашындагы юл-транспорт һәлакәтләре аеруча борчу тудыра. Ата-аналар еш кына баланың теләкләренә каршы килмиләр һәм моның нинди фаҗигале нәтиҗәләргә китерергә мөмкин булуы турында уйламыйлар. Ни кызганыч, республикада мондый очраклар теркәлгән. Дәүләт автоинспекциясе ата-аналарны балаларының транспорт чаралары белән идарә итү омтылышларына юл куймаска һәм кисәтергә, аларның автомобиль һәм мототранспорт ачкычларына ия булу мөмкинлеген булдырмаска чакыра. Балага автомобильләрдә һәм мототранспортта йөрүнең нәрсәгә китерергә мөмкин булуын аңлату мөһим, — дип ассызыклады Илдар Вәлиуллин.
Дәүләт автоинспекциясе бүлеге башлыгы утырышта катнашучыларның игътибарын юл-транспорт вакыйгаларында урам-юл челтәрендәге җитешсезлекләрнең дә фаҗига сәбәпчесе булуына юнәлтте. Аның сүзләренә караганда, хәзерге вакытта шәһәр юлларында транспорт агымнарын аера торган горизонталь тамгалар, шулай ук җәяүлеләр кичүләрендә тамгалар тулы күләмдә ясалмаган. Чатларда агач-куак үсемлекләре булу сәбәпле, аларны узу проблемасы актуаль булып кала.
Татарстанда юл хәрәкәте иминлеген тәэмин итү эшчәнлеге нәтиҗәләре һәм Чистай районында авариялелекнең торышы турында Татарстан Республикасы буенча ЮХИДИ идарәсенең техник күзәтчелек һәм теркәү-имтихан эше бүлеге башлыгы урынбасары Артем Корнилов
хәбәр итте.
— Чистай районында агымдагы елның 8 аенда юл-транспорт вакыйгалары һәм исерек машина йөртүчеләр гаебе белән зыян күрүчеләр саны арту күзәтелә, һәлак булучылар юк, — дип ассызыклады Артем Валентинович.
Артем Корнилов, исерек машина йөртүчеләр катнашында аварияләрне булдырмау максатыннан, авыл җирлекләре башлыкларына, исерек машина йөртүчеләрнең транспорт белән идарә итү очраклары турында ышанычлы мәгълүмат алу өчен, халык һәм иҗтимагый берләшмәләр белән хезмәттәшлек оештыруны сорап мөрәҗәгать итте. Мондый очраклар турында кизү часте телефоннары аша да хәбәр итәргә мөмкин.
Доклад ясаучы шулай ук гражданнардан исерек хәлдә булган машина йөртүчеләрнең транспорт белән идарә итү очраклары турында аноним мәгълүмат алу өчен Чистай районында телеграм-канал эшләвен искәртте. Ул аны популярлаштыру эшен дәвам итәргә чакырды.
Утырышта шулай ук шәһәр башкарма комитеты җитәкчесе Илдар Рәхимовның доклады тыңланды, ул мәгариф учреждениеләре янында урам-юл челтәрен төзекләндерү эшләре турында сөйләде. Ул ассызыклаганча, планлаштырылганнарның барысы да үтәлгән. Өстәмә финанслау исәбенә агымдагы елда Радищев, 5нче мәктәпкә бару юлы, Полющенков (28/5 йорттан 2нче лицейга кадәр), Чернышевский урамындагы 1нче балалар бакчасыннан 5нче мәктәпкә кадәр тротуарлар ремонтланачак. Авыл хуҗалыгы техникумы янында машина кую урыны барлыкка килгән.
Шулай ук мәктәп автобусларының яңа уку елына әзерлеге турында да сөйләштеләр.
— Уку процессы вакытында мәктәп автобуслары һәр көнне укучыларны уку урынына даими китерәләр, шулай ук балалар төркемнәрен массакүләм чараларга ташыйлар, — дип мәгълүмат бирде «Нур-Сервис» предприятиесе директоры Илдар Ситдыйков. — Мәктәп укучыларының иминлеген тәэмин итү максатыннан полиция хезмәткәрләре автобусларның төзеклеген һәм кирәкле документацияне алып баруны даими күзәтеп торалар. Мәктәп автобусларының укучыларны йөртүгә әзерлеге — Дәүләт автоинспекциясенең махсус контролендә.
Утырышта шулай ук шәһәрдә пассажирлар йөртүне оештыру, автобус паркының торышы, административ штрафларны түләтү эшләре, яшьләр оешмаларын һәм берләшмәләрен юл-транспорт имгәнүләрен кисәтү эшчәнлегенә җәлеп итү мәсьәләләре буенча фикер алыштылар.
Утырыш ахырында комиссия әгъзалары гражданнарның юл хәрәкәте иминлеге мәсьәләләре буенча мөрәҗәгатьләрен карадылар.