Иске покрышкалар нәрсәсе белән куркыныч һәм аларны Чистайда кайда тапшырырга мөмкин

Муниципалитет инициативасы һәм «Татнефть» компаниясе ярдәме белән шәһәрдә халыктан файдаланылган автомобиль шиннарын бушлай кабул итүнең беренче рәсми пункты эшли башлады. Проектның эшли башлавы турында үз социаль челтәрләрендә шәһәр башкарма комитеты җитәкчесе Айрат Хамматов хәбәр итте.

Алга таба иске шиннар утильләштерүгә җибәреләчәк. Айрат Рөстәм улы билгеләп үткәнчә, бу шәһәр башлыгы Дмитрий Иванов йөкләмәсе.

— Әйдәгёз, шәһәрне бергәләп чистарак һәм матуррак итик, — дип мөрәҗәгать итте чистайлыларга Айрат Хамматов.

Яңа кабул итү пункты контейнер мәйданчыгы янында Кулясов һәм Чернышевский урамнары киселешендә урнашкан. Шәһәр халкы хәзер иске резин покрышкаларны анда илтә ала. Шул ук вакытта хакимият шуңа да аерым игътибар бирә: мәйданчык бары тик шиннар өчен генә каралган.

Мөһим! Бу территориядә теләсә нинди башка чүп-чарны ташлау катгый тыела. Бу кагыйдәне бозган өчен 5000 сум күләмендә административ штраф каралган.

Бу ни өчен мөһим?
Автомобиль шиннарын аерым җыю һәм утильләштерү — чисталык мәсьәләсе генә түгел, ә җитди экологик бурыч та.

Шиннар туфракны һәм суны пычратып, табигый тирәлектә дистәләрчә еллар таркалмый.

Янганда алар атмосферага гаять агулы һәм кеше сәламәтлеге өчен куркыныч матдәләр бүлеп чыгаралар.

Дөрес утильләштерү исә бу проблемаларны хәл итәргә мөмкинлек бирә. Махсус предприятиеләрдә резинаны валчыкка әйләндерәләр, ул яңа файдалы материаллар: резин плитка, балалар һәм спорт мәйданчыклары өчен өслекләр, асфальт һәм башка әйберләр җитештерү өчен чимал булып хезмәт итә.

Кабул итү пунктын ачу — һәр кешегә туган шәһәрен төзекләндерүгә һәм әйләнә-тирә мохитне саклауга үз өлешен кертү мөмкинлеге ул.