Ил Беренчелегендә һәм Чемпионатында 5 алтын медаль яулаган армрестлер Җәлил Минапов уңыш сере белән уртаклашты

Күптән түгел ул терәк- хәрә­кәт аппараты зарарланган спортчылар арасында үткән Россия Беренчелегеннән һәм Чемпионатыннан кайтты. Ул үзенең үҗәтлеге һәм көчле булуы белән шаккатырды.

Җәлил «16 яшьтән 23 яшькә кадәрле спортчылар» яшь категориясендә беренче тапкыр чыгыш ясады. Ул 55+ кг PIU (басып өч сынашучылар) үлчәү категориясендә сул кул белән көрәштә потенциаль җиңү яулады, ә уң кул белән көрәштә өченче булды. Аннары яшүсмер 65+ кг WAF PIU үлчәү категориясендә катнашты. Бу яңа үлчәү категориясе, ул пара-армрестлингның Халык­ара Федерациясендә берничә ел элек барлыкка килде. Бу категориядә ул ышанычлы төстә уң һәм сул кул белән көрәштә җиңү яулады һәм дөнья чемпионатына сайлап алуны үтте.

Әлеге ярышларда ул 5 алтын медаль яулады, үзенең осталыгын күрсәтте. Шунысын да билгеләп үтәргә кирәк, Җәлил 2023 елның армспорт буенча иң яхшы көрәшчесен җиңү бәхетенә иреште.

— Ярышлар алдыннан мин нык дулкынландым, бер нәрсә дә килеп килеп чыкмас яисә нәтиҗә ошамас дип кайгырдым, –дип тәэсирләре белән уртак­лаша Җәлил. — Мин янәшәмдә әтием һәм тренерым булганга бик шат, алар мине тынычландырдылар, алар ярдәме белән мин җиңү яуладым. Миңа ярышлар бик ошады. Барысы да яхшы булганга нык шатланам.

–Син армрестлингка ничек килдең? Әлеге спорт төре нәрсәсе белән үзенә җәлеп итте?

–Мин элек грек-рим көрәше, каратэ һәм йөзү белән шөгыль­ләндем. Бервакыт тренер Радик Рәшит улы Камалов белән таныштым. Ул мине армрестлинг буенча тренировкаларга чакырды, миңа анда бик ошады. Шуннан бирле спортның әлеге төре белән шөгыльләнәм.

–Армрестлингның үзенчә­лек­ләре нинди? — дип сорадым мин әңгәмәдәшемнән.

— Армрестлинг өчен, башка спорт төрләре кебек үк, дисцип­лина кирәк. Тренировкаларга даими рәвештә йөрү сорала. Тренировкаларга даими йөрү һәм үз өстеңдә эшләү иң яхшы армрестлер булырга һәм спортның бу төрендә уңышка ирешергә ярдәм итә. Ялкауланырга ярамый, үз күнекмәләреңне даими рәвештә үстерү сорала, өстәмә шөгыльләнүләр дә кирәк. Сүз уңаеннан, монда мине бабам рухландыра, ул минем өчен үрнәк.

Җәлилнең бабасы Равил Ибраһим улы — көрәш буенча СССР спорт мастеры. Ул үз тәҗрибәсе буенча ничек яхшы нәтиҗәләргә ирешеп буласын яхшы белә һәм үзенең оныгы белән чиксез горурлана.

— Мин мондый нәтиҗәгә бик шат. Башта Җәлил Татарстан Беренчелегендә, аннары Россия беренчелендә дә отты. Ул 5 алтын медаль яулады, армспортның «Дан Аллеясе»нә керде. 23 яшьлек егетләр белән ярышты, аңа 16 яшь кенә бит әле. Спорт мастерлыгына кандидат булды. Мин аның яшендә бу бик зур уңыш дип саныйм, — дип билгеләп үтте Равил Минапов.

Равил Ибраһим улы безнең шәһәрдә армспортка нигез салган атказанган тренер Фоат Уразгильдеевка рәхмәт белдерде. Нәкъ менә ул искиткеч тренерларны, шул исәптән Җәлилнең тренеры Радик Камаловны да әзерләгән (ул Россия беренчелегендә иң яхшы тренерлар рейтингына керде). Равил Ибраһим улы «Батыр» спорт мәктәбенә рәхмәт белдерде.
Җәлилнең әтисе дә улының спорт тормышында актив катнаша. Үсмернең аягына авыр операция ясаган вакытта, ул спорт мәктәбенә озак вакытлар тренировкаларга йөри алмый. Шул вакытта әтисе армспорт белән шөгыльләнү өчен өйгә махсус станок сатып ала, бу исә үсмергә армспорт белән шөгыльләнүдә зур роль уйный.

Хәзер Җәлил атнасына 5 тапкыр тренировкаларга йөри, залда ике сәгать ярым шөгыльләнә. Моңардан тыш, ул «Алдынгылар хәрәкәте» активисты, мәктәптә актив укучыларның берсе: линейкалар үткәрә, күп кенә төрле чараларда катнаша. Ул һәрвакыт мәшгуль, һәрвакыт нинди дә булса эштә!

— Миңа спортны башка эшләр белән аралаштыру авыр түгел. Спортка көненә ике сәгать ярым вакытымны бирәм, ә буш вакытымда башка чараларда катнашам, — дип сөйли Җәлил.
Аның хезмәт сөючәнлеге, үҗәтлеге, максатчан булуы турында Радик Камалов та билгеләп үтте.

— Дүрт ел эчендә ул бер көн дә сәбәпсез тренировка калдырмады. Спорт залында үзен 100 процент күнекмәләргә бирә, аны өенә куып та кайтарып булмый, — дип шаярта Радик Рәшит улы.

— Үзе бервакытта да тиз генә китми, соңгы минутларга кадәр күнекмәләр ясый. Шулай ук ул югары техник осталыкка да ия, бу исә әлеге спорт төрендә мөһим роль уйный. Шуны да өстисем килә, ул армрестлинг буенча Европа һәм дөнья чемпионатына сайлап алынды инде. Җәлилгә киләчәктә уңышлар телим. Ирешелгәннәрдә тукталып калмыйча, яңа үрләр яуларга һәм бары алга барырга насыйп булсын!