Ифтарда катнашучылар бергәләп авыз ачтылар, аралаштылар, таҗик халкының традицияләре турында күбрәк белделәр

Аларның күбесе — хатын-кызлар. Төрки һәм Иран халыкларының язгы бәйрәме булган Нәүрүз көнендә бердәм ифтар шәһәрнең таҗик диаспорасы инициативасы белән үткәрелде.

— Әлеге ифтарга без шәһәре­безнең төрле өлкәләрендә эшләүче хатын-кызларны чакырдык. Максатыбыз — мөсел­ман­нарның изге ае Рамазанда авыз ачтыру һәм таҗик традицияләре белән таныштыру, очрашу, аралашудан гыйбарәт иде, — дип сөйләде «Әнәс» мәчете имам-хатыйбы, Чистайда таҗик диаспорасы җитәкчесе Әбүбәкр хәзрәт Азизов.
Бәйрәм кунакларын урамда милли киемнәр кигән артистлар каршы алды. Мәдәни үзәк фойе­сы көнчыгыш бизәкләр белән баетылган: милли көйләр яңгырый, матур орнаментлар белән чигелгән бәйрәмчә таҗик киемнәреннән күргәзмә оештырылган. Алар аерым бер фотозона тудыралар, аерым мохит булдыралар.
Бәйрәмне Әбүбәкр хәзрәт традицион таҗик барабаны — таблакта уйный-уйный ачып җибәрде. Аннары өлкәннәр һәм балалар Нәүрүзгә, аның тарихына, традицияләренә багышланган мавыктыргыч викторинада катнаштылар. Бәйрәмдә катнашучылар изге теләкләр һәм котлаулар белән төрле телләрдә шигырьләр укыдылар. Шуннан соң барысы да залга авыз ачарга керделәр.
Өстәлләрдә татар һәм та­җик ха­лык­ларының традицион ризыклары, пешкән камыр ашлары, җиләк-җимешләр, чикләвекләр, су. Ә өстәл уртасында үрде­релгән бодайның яшел сабаклары, ә алар янәшә­сендә сумаляк, Нәүрүзнең төп ризыгы ул, яз килү символы. Аны үрдерелгән, вакланган бодай бөртекләреннән, оннан һәм азрак көнбагыш мае салып казанда бутый-бутый унике сәгать дәвамында әзерлиләр.
Ифтар башланганчы Чис­тай районы имам-мөхтәсибе Мөхәммәд хәзрәт Кыямов һәм «Әнәс» мәчете имам-хатыйбы Әбүбәкр хәзрәт Азизов Коръән сурәләре укыдылар. Алар барлык мөселманнарны Рамазан ае һәм Нәүрүз бәйрәме белән котладылар.
Муниципаль район баш­­лыгы Дмитрий Иванов исе­меннән кунакларны район Советы аппараты җитәк­чесе Равил Мәзгутов сәлам­ләде.
Бөтендөнья татар конг­рес­сы башкарма комитеты җитәкчесе урынбасары — ТР буенча бүлек­чәләр эшләре комитеты начальнигы Ирек Шәрипов барысын да кайнар котлап, татар халкының традицияләрен саклауга һәм үстерүгә керткән өлешләре өчен чистайлыларга Рәхмәт хатлары һәм истәлек бүләк­ләре тапшырды.
Әлеге чара кунаклары­ның берсе — Татарстанның рәссам­нар берлеге әгъзасы Анастасия Бузунеева чистайлыларга аерым бүләк ясады. Ул безнең шәһәребезнең иң истәлек­ле урыннарыннан берсе сурәт­ләнгән картинаны «Әнәс» мәче­тенә бүләк итте.
Азан тавышы яңгырагач, мөселманнар авыз ачтылар, кичке намазны укыдылар. Намаздан соң барысы да өстәлдәге сый-нигъмәтләр белән сыйландылар.
Ифтарда катнашучылар өчен мөнәҗәтләр, җирле, шулай ук «Созвездие-Йолдызлык» яшьләр эстрада сәнгатенең фестивале җиңүчеләре башкаруында татар җырлары яңгырады.
Бөтендөнья татар конг­рес­сы­ның җирле бүлекчәсе җитәкчесе, мөхтәсибәт каршындагы аксакаллар Советы рәисе Фәрит Галимов белән Татарстанның атказанган мәдәният хезмәткәре Рафик Әхмәтов чыгышларында үз халкыңның традицияләрен һәм гадәтләрен саклауның мөһим­леге хакында сөйлә­деләр. Ифтар­ны оештыручылар һәм катнашучылар билгеләп үткәнчә, мондый чаралар изге айда дин кардәшләребезне рухи яктан ныгыта, берләштерә.

Бу кызыклы:
Нәүрүз бу иран һәм төрки халыкларының язны каршылау бәйрәме. Ел саен бу бәйрәмне бар дөнья буенча 300 миллион кеше билгеләп үтә. Персид теленнән тәрҗемә иткәндә ул «Яңа көн» дигәнне аңлата. Бәйрәмнең күпгасырлык тарихы бар, ә 2010 елдан башлап рәсми рәвештә халыкара бәйрәм дип танылды һәм Берләшкән Милләтләр оешмасы (БМО) календаренә кертелде.