Яшьләр Чистай районында ришвәтчелекнең торышы турында сөйләделәр

Ришвәтчелеккә каршы тору буенча район комиссиясенең чираттагы утырышы муниципаль район башлыгы Дмитрий Иванов рәислегендә узды.

2022 елда тышкы финанс контроле кысаларында контроль-хисап палатасы үткәргән чаралар турындагы беренче мәсьәлә буенча контроль-хисап палатасы рәисе Ольга Гришина чыгыш ясады.

– Хисап чорында контроль-хисап палатасы тарафыннан 36 контроль һәм эксперт-аналитик чара үткәрелде. Тикшерүләр шәһәр башкарма комитетында, авыл җирлекләрендә, районның мәгариф учреждениеләрендә үтте. Зур булмаган берничә кагыйдә бозу ачыкланды, алар бетерелә, – дип билгеләп үтте доклад ясаучы.

Утырышта катнашучылар районда ришвәтчелек торышы турында социологик сораштыру нәтиҗәләрен дә тикшерделәр. Җәмәгатьчелек фикерен мониторинглау нәтиҗәләрен Яшьләр үзәге директоры Марина Елисеева игълан итте. Ул 18 яшьтән 35 яшькә кадәрге яшьләр арасында социаль сораштыру үткәрелгәнен сөйләде. Анда 508 кеше: югары һәм урта һөнәри белем бирү оешмалары студентлары һәм хезмәткәрләре, шәһәр учреждениеләре һәм предприятиеләре хезмәткәрләре катнашкан. Сораштыру беренче тапкыр электрон форматта узган, бу катнашучылар санын арттырырга мөмкинлек биргән.

– Сораштыруда катнашучылар фикеренчә, иң ришвәтчел һөнәрләр – Дәүләт автоинспекциясе, медицина хезмәткәрләре, югары уку йортлары укытучылары, хәрби комиссариат хезмәткәрләре, предприятие җитәкчеләре. Сораштыруда катнашучыларның күпчелеге ришвәтчел хәлләргә китерә торган иң еш очрый торган сәбәпләр дип бюджет өлкәсе хезмәткәрләренең түбән хезмәт хакы һәм җәмәгать контроле булмауны саныйлар, – дип билгеләп үтте Марина Александровна.

Доклад ясаучы сүзләренә караганда, респондентларга ришвәт бирергә этәргән сәбәпләр, суммалар, райондагы ришвәтчелек дәрәҗәсен ничек бәяләүләре турында сораулар бирелгән.

– Әлеге тикшеренү нәтиҗәләре буенча, Чистай районында ришвәтчелеккә каршы тору буенча системалы эш гражданнар тарафыннан күпчелек очракта уңай бәяләнә, яшьләр ришвәтчелек кими дип саныйлар, – дип йомгак ясады Марина Елисеева.

Ул яшьләр эшләре бүлеге учреждениеләрендә уздырылган ришвәтчелек күренешләренә юл куймау буенча чараларның нәтиҗәлелеген арттыру темасына кагылган түбәндәге мәсьәлә буенча да чыгыш ясады. Чыгыш ясаучы сүзләренә караганда, узган ел мондый чараларга 14 яшьтән алып 35 яшькә кадәрге 7 меңнән артык кеше җәлеп ителгән, аларда мәктәп укучылары, студентлар, эшче һәм авыл яшьләре катнашкан. Марина Елисеева ассызыклаганча, ришвәтчелеккә каршы чаралар җәйге вакытта да актив үткәрелә, аларны районның сәламәтләндерү лагерьларында оештыралар.

Бу мәсьәлә буенча өстәмә доклад белән үзәкләштерелгән мәдәни-ял итү учреждениеләре системасы директоры Ольга Рыжова чыгыш ясады. Ул структур бүлекчәләрнең халык белән кисәтү эшен башкару, ришвәтчелеккә каршы эшнең төп формалары турында сөйләде. Теманы спорт бүлеге башлыгы Айрат Әхмәтшин дәвам итте. Ул бу юнәлештәге ведомство карамагындагы учреждениеләрнең эшчәнлеге турында хәбәр итте.

Муниципаль җир участокларын арендага бирү, җир участокларын һәм мөлкәтне сатып алу-сату, объектларны сату буенча аукционнар үткәрү турында мәгълүмат тыңланды. Бу темага доклад белән җир һәм мөлкәти мөнәсәбәтләр палатасы җитәкчесе Марина Исхакова чыгыш ясады.

– Ришвәтчелекне кисәтү чараларының берсе – палата тарафыннан күрсәтелә торган муниципаль хезмәтләрне күпфункцияле үзәккә тапшыру, бу гариза бирүчеләр белән аралашуны минимумга җиткерә. Үз вәкаләтләре кысаларында палата кабул иткән барлык норматив-хокукый актлар прокуратурага ришвәтчелеккә каршы экспертизага җибәрелә, – дип ассызыклады Марина Юрьевна.

Чистай муниципаль районы башлыгының ришвәтчелеккә каршы тору буенча ярдәмчесе Алексей Ефимов билгеләп үткәнчә, утырышта каралган барлык мәсьәләләр – актуаль һәм планлаштырылган. Киңәшмәдә район җитәкчелеге күзәтүе астында һәрвакыт контрольдә булырга тиешле темалар каралды.