Янгын нәтиҗәсендә торак йортның верандасы һәм түбәсе янып беткән

7 декабрьдә, 13 сәгать 40 минутта коткару хезмәтенә Татар Ялтаны авылында Пролетарская урамындагы ике фатирлы торак йортның януы турында хәвефле шалтырату керә.
Беренче янгын сүндерү расчетлары килеп җиткәндә йорт дөрләп яна торган булган: бер фатирның верандасы һәм бинаның түбәсендә ачык ялкын күренгән.

Янгын сүндерүчеләр ашыгыч рәвештә утны сүндергәннәр, ләкин йортка зыян килгән. Янгын нәтиҗәсендә йортның бер фатиры һәм түбәсе зыян күргән. Бәхеткә, һәлак булучылар һәм зыян күрүчеләр юк.

– Беренчел сәбәп электр җиһазларын кулланганда янгын иминлеге кагыйдәләрен бозу, – дип хәбәр иттеләр Чистай районы буенча күзәтчелек эшчәнлеге һәм кисәтү эшләре бүлегендә.

Безнең район территориясендә янгыннар статистикасы шуны ачык күрсәтә: электр җиһазларының авария режимында эшләве һәм аннан файдаланганда кагыйдә бозулар торакта янгын чыгуның иң еш очрый торган сәбәбе булып тора. Иске яки ватык приборлар гына куркыныч тудырмый. Еш кына фаҗигаләр безнең үз гамьсезлегебез аркасында килеп чыга:

• Розеткаларны һәм челтәр фильтрларын артык йөкләү.
• Төзек булмаган яисә кулдан ясалган электр приборларын куллану.
• Изоляциясе бозылган электр үткәргечләрен эксплуатацияләү.
• Челтәргә тоташтырылган приборларны (җылыткычларны, зарядка җыю җайланмаларын, телевизорларны) күзәтүсез калдыру.