Халык билгеләнгәннән артыграк түләргә тиеш түгел

Эш шунда, җылылык белән тәэмин итүчеләр җылылык куллану исәпләү приборлары булмаган йортларда яшәүчеләргә ай саен норматив буенча счетлар җибәрәләр иде. Әмма җылылык исәпләгечләрен файдалануга кертү белән хәл үзгәрде. Торакчылар исәпләү приборларының уңай һәм тискәре якларын җитәрлек дәрәҗәдә аңлату үткәрмәделәр. Нәтиҗәдә, яшәүчеләргә җылылык һәм кайнар су өчен шактый сумма килгән. Риза булмаганнар шунда ук дәгъвалар белән төрле инстанцияләргә мөрәҗәгать итә башлыйлар, хәтта республика хөкүмәтенә кадәр барып җитәләр, биредә әлеге мәсьәләне хәл итүгә җитди алыналар.

ТР Премьер-министры вазифаларын башкаручы Р. Моратов әлеге мәсьәлә буенча видеоконференция үткәрде, анда барлык муниципаль берәмлекләр җитәкчеләренең игътибарын халык өчен түләүләрне нигезсез арттыруга юл куймауга юнәлтте. Беренче бозулар Әлмәттә, шуннан соң республиканың кайбер башка муниципаль берәмлекләрендә ачык­ланды. Шулай, җылылык буенча түләүләрнең артуы Татарстанның төрле районнарындагы 1859 йортта ачыкланган. Шуңа да ТР Төзелеш, архитектура һәм ТКХ министрлыгы каршында штаб оештырылды, анда түләүләргә анализ үткәрелә башлады, өстәвенә, җылылык өчен генә түгел, ә каты көнкүреш калдыкларын чыгару, торак фонд белән идарә итү буенча да түләүләрнең арттырылуы ачыкланды. ТР икътисадый һәм социаль тикшеренүләр үзәге министрлык белән бергә хәзерге вакытта барлык муниципаль районнарда күләмле тикшерүләр үткәрә.

Узган җомгада безнең муниципаль районда да шундый тикшерү булды. Әйтергә кирәк, бозулар тиз арада бетерелде. Видеоконференциядә булган муниципаль район башлыгы И. Әхмәтҗанов штаб оештырылуы турында хәбәр итте, анда ТКХ өчен халык түләүләрен арттыру очраклары анализлана. ТКХ өчен түләүләрнең артуы белән хәл 62 йортта каралды һәм әлеге эш дәвам итә. Аерым алганда, күптән түгел хуҗалары җылы идәннәр җәйгән өч фатир ачыкланган, ә моның өчен нәтиҗәдә җылылык өчен түләүләрнең артуы сәбәпле барлык яшәүчеләргә түләргә туры килгән. Һәм мондый мисаллар аз түгел, шуңа күрә муниципаль район башлыгы тарафыннан шәһәрдә яшәүчеләр белән очрашулар үткәрергә һәм тиешле хезмәтләр вәкилләре белән берлектә торак коммуналь хезмәтләр өчен түләүләр формалашу процессын аңлатырга кирәклеге турында карар кабул итте. Инде шундый берничә очрашу булды.

Шәһәрнең төрле микрорайоннарында муниципаль районның җирле үзидарә органнары бердәм исәп-хисап үзәге, проблемалы йортлар белән идарә итүче һәм хезмәт күрсәтүче компанияләр вәкилләре сос­тавында эшче төркемнәр оештырылган. Йортларны карап йөрүдән тыш, төрле адреслар буенча халыкны кабул итү алып барыла. Көн азагында эшче төркемнәр җыелалар һәм проблемалы йортлар буенча хәлгә анализ ясыйлар.

Муниципаль районда күп фатирлы йортлар булган авыллар да проблемалар тудыра, чөнки йортларны җылыту буенча хезмәтләр өчен шактый югары тарифлар тотарга туры килә. Әмма проблема хәзер инде хәл ителә - авылда күп фатирлы йортлар ике контурлы казаннарга, шулай ук блоклы котельныйларга күчерелә. Соңгыларына районның кайбер бюджет учреждениеләре дә күчә. Шулай ук Чистайны җылылык белән тәэмин итү планын гамәлгә кертү уңаеннан да хәл кинәт яхшы якка үзгәрергә тиеш.

Килеп чыккан хәлгә аңлатма биреп, Р. Моратов хәзер иң мөһиме халыкка ТКХ өчен түләүләрне формалаштыру ысулын җентекле аңлату дип билгеләп үтте. Көн саен ТР Төзелеш, архитектура һәм ТКХ министрлыгы республиканың төрле районнарын үткәрелгән тикшерүләр, торак коммуналь хезмәтләр өчен түләүләрнең артуына юл куймау буенча штаблар эше турында тыңлый.