Гыйнварда халыктан коммуналь хезмәтләр өчен түләүләр 95 процентка җыелган
2026 елның гыйнварында Татарстанда халыктан торак-коммуналь хезмәтләр өчен түләүләрне җыю дәрәҗәсе 95 процент тәшкил иткән. Бу хакта бүген ТР Хөкүмәте йортында узган киңәшмәдә республиканың төзелеш, архитектура һәм торак-коммуналь хуҗалык министры Марат Айзатуллин сөйләде, дип хәбәр итә ТР Рәисе матбугат хезмәте
Барлык муниципаль районнар белән видео-конференц-элемтә режимындагы киңәшмәне ТР Премьер-министры Алексей Песошин алып барды.
Марат Айзатуллин сүзләренә караганда, соңгы елларда түләү дисциплинасын мониторинглау ел башында түләүләрнең начар җыелу тенденциясен, икенче яртыеллыкта җыемның артуын күрсәтә. Узган елның шул ук чоры белән чагыштырганда, быел гыйнвардагы күрсәткеч 0,7 процентка кимегән. Шул ук вакытта уртача еллык күрсәткеч 99,3 процент тәшкил иткән, бу узган елгы күрсәткечтән 0,4 процентка күбрәк. Министр шулай ук электрон форматта башкарылган түләүләр өлеше 82 процент җиткәнен хәбәр итте, әмма районнар бу өлкәдә төрле нәтиҗәләр күрсәтә.
2026 елның 1 февраленә булган мәгълүматларга караганда, газ өчен түләнмәгән бурыч суммасы якынча 226 млн сум тәшкил итә. Бу узган ел белән чагыштырганда 3 млн сумга азрак.
Электр энергиясе өлешендә түләнмәгән бурыч суммасы 9 млн сумга кимегән. 1 февральгә бурыч суммасы барлыгы 8 млн сум чамасы тәшкил итә. Шул ук вакытта идарәче компанияләрнең җылылык өчен бурычлары февраль башына 10,3 млн сумга арткан һәм 158,9 млн сум тәшкил иткән. Идарәче оешмалар буенча срогы чыккан бурычларның артуы Казанда, Яр Чаллыда һәм Түбән Камада күзәтелә.
Татарстан Республикасы Төзелеш министрлыгы башлыгы тупланган суммаларны каплау буенча чаралар күрү зарурлыгына игътибарны юнәлтте.
Чыганак: «Татар-информ»
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Район тормышына кагылышлы иң мөһим яңалыкларыбызны «Чистополь-информ» Telegram-каналыбызда да укыгыз
Нет комментариев