Гитара кыллары белән ул күңел кылларын тибрәтте

«Күңел кыллары» дигән матур исем йөрткән автор җыры фестивале һәр җәй саен Романовская авылында Донның комлы ярында уза. Аны үткәрү елларында якташларыбыз арасыннан йөзләгән талантлы автор һәм башкаручы үз осталыгын күрсәтте. Россия территориясендә ул оештыру дәрәҗәсе һәм катнашучылар саны буенча иң зурлардан санала. 

Быел күпсанлы тамашачы һәм мәртәбәле жюри хөкеменә Корея, Германия, Израиль, Казахстан, Украина, Белоруссия һәм башка илләрдән 500дән артыграк кеше үз иҗатын тәкъдим итте. Алар арасында җыр коллективлары да, бард җырларын автор-башкаручылар да бар. 

Талантлы башкаручылар арасында республикадан читтә дә танылган якташыбыз, бард Таһир Мөхәммәтов та бар. 

– Шундый киң колачлы конкурсларда чыгыш ясарга күнеккән булсам да, «Күңел кыллары» фестивале сәхнәсендә мин беренче тапкыр чыгыш ясадым. Дустым Илья Оленевка рәхмәт, нәкъ менә ул миңа ышанды һәм катнашырга тәкъдим итте, – дип уртаклаша безнең белән Таһир Габдулла улы. – Җентекле әзерләндем, чөнки мин призлы урын алырга дип бардым. 

Таһир Мөхәммәтов фестивальдә безнең шәһәрне лаеклы тәкъдим итте. Ул кечкенә өяз шәһәре, биредәге тормыш, мәхәббәт, табигать, гади кеше шатлыклары турында үзенең автор җырларын күңелгә үтеп керерлек итеп башкара. 

Чыгышлар нәтиҗәләре буенча, бард фестивальнең иң яхшы авторлары арасына керә. Бүләкләү тантанасында «Автор» номинациясендә аңа икенче дәрәҗә диплом тапшырыла. 

Яшь авторлар да үзләрен күрсәтә ала, алар бард-батлда катнаша. Барлык теләүчеләр өчен ирекле микрофон концерт шигъри мәйданчыгы оештырыла.

Фестивальне оештыручылар ял итү турында да кайгыртканнар. Рәсми өлештән соң катнашучылар, кунаклар һәм тамашачылар Дон казакларының тере халык мәдәнияте белән таныштылар, «Җырла, бие, казаклар Доны» сәхнә мәйданчыгында булдылар, фольклор коллективлары программаларында катнаштылар. 

Фестивальнең кунак ишегалдында Волгодонск районы авыллары музейларының күчмә экспозицияләре эшләде. Дон балык ашын, рус окрошкасын, Украина эремчек пилмәнен һәм сало белән тозлы кыярдан авыз итәргә, шулай ук борынгы туптан атуны күрергә һәм ишетергә, Дон атларында атланып йөрергә мөмкин иде. 

Якташыбыз Таһир Мөхәммәтовның җиңүе белән горурланабыз! Афәрин! Аңа чиксез илһам һәм иҗади уңышлар телибез!