Газетабызның хезмәте лаеклы бәяләнде

Без үз-үзләренә, үз мәшә­кать­ләренә йомылган кеше­ләрдән «игелек», «ярдәм», «бер-береңә ярдәм кулы сузу» ди­гән сүзләр сирәк яңгырый торган катлаулы заманда яшибез. Әмма безнең арада да өлкәннәргә, авыру кешеләргә, ялгызларга, балаларга ярдәм итәргә ашкынып торган волонтерлар, ирекле ярдәмчеләр бар.

Бу теманы яктырту, һәр кешенең күңел кылларына кагылу өчен «Чистопольские известия» («Чистай хәбәрләре») республиканың дистәләгән редакциясе һәм журналистлары белән беррәттән үз битләрендә игелек кылучы кешеләр һәм оешмалар турында сөйли. Сүз социаль юнәлешле коммер­цияви булмаган оешмалар турында бара.

Агымдагы елның җәендә аларның эшчәнлеген иң яхшы яктырту буенча конкурс старт алды. Безнең газетадан шәһәрдә һәм районда коммерцияви булмаган оешмалар эшчәнлеге турында язмалар җибәрелде.

Әгәр элек без конкурска социаль юнәлешле коммерцияви булмаган бер берләшмә эше турында язма тәкъдим иткән булсак, быел конкурс жюрие игътибарына Чистайның берничә коммерцияви булмаган оешмасының төрледән-төрле эшчәнлеге лаек булды. Жюри күз уңына блогерлар мәктәбе эләкте. «Мин яшәгән дөнья» проекты төрле яшьтәге, төрле диндәге, сәламәт һәм мөмкинлекләре чикле балаларны бер иҗади мохиткә берләштерде. Алар бергәләп социаль җайлаша, ачыла һәм уңышларга ирешә алдылар, – дип сөйли «Татмедиа» АҖ филиалының «Чистай-информ» җитәкчесе Наталья Данилова. – Газета укучыларының игътибарын яшь буын өчен үзенчәлекле стартап булып торган РГҖ мәйданчыгы да җәлеп итте. Безнең коррес­пондентларыбыз чистайлыларны Бөтенроссия сукырлар җәмгыяте оешмасы активистлары эшчәнлеге белән дә таныштырдылар. Үзеңне алар урынында күз алдына китерсәң, әлеге гүзәл дөньяны күрмәү куркыта. Ә алар төшенкелеккә бирелмиләр, актив яшәү рәвеше алып баралар, шигырьләр язалар һәм хәтта бию бәйгеләрендә дә җиңәләр! Безгә алардан күп нәрсәгә өйрәнергә кирәк. Шуның өстенә, бу кешеләр башкаларга да яктылык өләшәләр – проектларны актив эшлиләр, ә алардан кергән акчаны күрмәүче кешеләрнең ялын баету өчен кулланалар. «Ак калфак» җәмәгать оешмасының җирле бүлекчәсе энтузиастлары башка юнәлештә эшлиләр. Алар туган телне, милли мәдәниятне, гореф-гадәтләрне, әхлакый кыйммәтләрне саклап калу буенча эш алып баралар, үз гаиләләренең шәҗәрәләрен төзиләр.

«Чистопольские известия» («Чистай хәбәрләре») газетасы редакциясе коллективы конкурста мактаулы I урынга лаек булды. Без хезмәтебезнең лаек­лы бәяләнүенә шатбыз.

Конкурс дүртенче тапкыр үткәрелә. Ул Республика матбугат һәм массакүләм коммуникацияләр агентлыгы тарафыннан Татарстан Иҗтимагый палатасының актив катнашуында оештырыла.

 Безнең өчен конкурсның кирәклеге һәм актуальлеге бәхәссез. Кабул ителә торган эшләр саны да бу хакта сөйли. Узган ел 280 иде, быел якынча 500ләп, – дип билгеләп үтте «Татмедиа» АҖ җитәкчесе урынбасары Илдар Миргалимов.

«Татмедиа» Республика матбугат һәм массакүләм коммуникацияләр агентлыгында җиңүчеләрне бүләкләү тантанасында Наталья Даниловага лаеклы бүләкне тантаналы шартларда Татарстан Иҗтимагый палатасы рәисе Зилә Вәлиева тапшырды.

Әлеге көчле рухлы хатын-кыз-сәясәтченең волонтер­ларның, ирекле ярдәмчеләрнең эшчәнлеген җәмгыять өчен бик мөһим булуын күрә белүе сөендерә. Социаль мәсьәләләрне хәл итү, башка кешеләргә ярдәм күрсәтү беренче планга куела. Ярдәмгә мохтаҗ кешеләр һәрвакыт бар. Бу – тану да, коммерцияви булмаган оешмаларның эш сыйфатын арттыру өчен нигез дә.

Коронавирус пандемиясе чорында бу институтларның ни дәрәҗәдә мобиль булуын, икенче көнне бар көчләрен оештыруларын, ярдәм кулы сузуларын күрдек, – дип билгеләп үтте ТР Иҗтимагый палатасы рәисе. – Коммерцияви булмаган оешмалар үзләре үк катлаулы икътисади хәлдә калды, әмма алар башка кешеләргә ярдәм итүләрен дәвам итәләр.

Чыннан да, өлкән яшьтәге ялгыз чистайлылар эпидемия башланганнан бирле ирек­ле ярдәмчеләрнең ярдәмен үз җилкәләрендә тойдылар. Шуңа күрә ярдәмчел булыгыз, безнең тормышта батырлыкка һәрвакыт урын бар, изге гамәлләр кылырга ашыгыгыз!