Гадәттән тыш хәлләр министрлыгы эше, катлаулы яз һәм юл-транспорт вакыйгасында өч кешенең һәлак булуы – Чистай районында аппарат киңәшмәсенең төп темалары

Халык өчен яшеренү урыннары тәртипкә китерелә

Россия Гадәттән тыш хәлләр министрлыгының Татарстан Республикасы буенча бүлегенең 2025 елдагы эшчәнлегенә йомгаклар турындагы доклад белән бүлек начальнигы Радик Рәхмәтуллин чыгыш ясады. Ул хәбәр иткәнчә, узган елда районда транспорт белән тәэмин итү мәсьәләләрен үз эченә алган эвакуация чараларын оештыру планы эшләнгән һәм ТР Гадәттән тыш хәлләр министрлыгы белән килештерелгән. Шулай ук эвакуация органнарының үзләренә йөкләнгән бурычларны үтәүгә әзерлеге буенча эш оештырылган һәм алып барыла.

Халыкны гражданнар оборонасы һәм гадәттән тыш хәлләр өлкәсендә укыту җайга салынган. Аерым алганда, җитәкче вазифаи затлар 100 процентка укытылган. Ел дәвамында оешмаларга ГО һәм гадәттән тыш хәлләр линиясе буенча тренировкалар үткәрүдә методик ярдәм күрсәтелгән: 7 команда-штаб, 21 штаб һәм 9 объект өйрәнүләре үткәрелгән.

Районда халыкка ашыгыч хәбәр итүнең 7 системасы урнаштырылган. Әлеге системалар зонасы чикләрендә 73 процент яшәүче колачлана. Кешеләр яшеренү өчен планлаштырылган подвал бүлмәләрен әзерләү буенча зур эш башкарылган: трафаретлар ярдәмендә кирәкле мәгълүмати язулар ясалган, эскәмияләр куелган, электр яктырткычлары монтажланган.

Эшләр югары катлаулылык шартларында алып барыла

Авыл хуҗалыгы һәм азык-төлек идарәсе башлыгы Александр Ромадановский районның аграр секторындагы вәзгыять турында сөйләде. Ул билгеләп үткәнчә, быел язгы кыр эшләре катлаулы шартларда бара: республиканың кайбер районнарында, шул исәптән безнең районда да, туфракның артык дымлы булуы күзәтелә. Шуңа да карамастан, кырларда берничә төрле эш – көзге культураларны һәм күпьеллык үләннәрне тукландыру, туңга сөрү алып барыла. Районның ике хуҗалыгы чәчүне дәвам итә. Орлыкларны инкрустацияләү төгәлләнгән һәм уңай һава торышы урнашу белән алар чәчеләчәк.

Узган атнада 443 тонна сөт савылган, 420 тонна сатылган, сөтнең уртача бәясе – 31 сум. Терлекләр үрчетү кысаларында 9 бозау туган.

Юл-транспорт вакыйгасы нәтиҗәсендә өч кеше һәлак булган

Оператив сводканы Россия Эчке эшләр министрлыгының Чистай районы буенча бүлеге полиция начальнигы урынбасары Антон Ерашов тәкъдим итте. Бер атна эчендә район территориясендә өч җинаять: ике мошенниклык һәм сәламәтлеккә җиңелчә зыян китерү очраклары теркәлгән.

Юлларда 11 юл-транспорт вакыйгасы килеп чыккан, нәтиҗәдә, биш кеше төрле дәрәҗәдәге имгәнүләр алган, өч кеше һәлак булган. ЮХИДИ хезмәткәрләре юл хәрәкәте кагыйдәләрен бозучы 90 кешене җаваплылыкка тарткан, бер машина йөртүче исерек хәлдә автомобиль йөрткән өчен тоткарланган. Бер атна эчендә 123 кеше административ җаваплылыкка тартылган.

***

Ахырда Эдуард Хәсәнов район предприятиеләре һәм учреждениеләре коллективларына ике үтенеч белән мөрәҗәгать итте: «Георгий тасмасы» акциясенә булышлык күрсәтү һәм 2027 елда «Яшәү өчен инфраструктура» илкүләм проект кысаларында төзекләндерү өчен өстенлекле объектларны сайлау өчен активрак тавыш бирү.

14 яшьтән өлкәнрәк гражданнар 2027 елда төзекләндереләчәк иҗтимагый территорияләрне түбәндәге сылтама буенча: https://pos.gosuslugi.ru/lkp/fkgs/home/ сайлый ала. Шул ук порталда узган еллардагы нәтиҗәләр – 2025 елда сайланган һәм 2026 елда төзекләндерелгән объектлар белән танышырга мөмкин.