«Эретеп ябыштыру эшенә өйрәнә башлаганыма үкенмим»

Яшьләр үзләштерә алган һөнәрләр исемлегендә 61 позиция: ташчы, юл эшчесе, официант, тракторчы-машинист, сыйфат контролеры, эретеп ябыштыручы, слесарь, монтажчы, тегүче, электр монтажчы һәм башкалар. Әмма уку белән генә эш тәмамланмаячак: тиешле таныклык алган барлык студентлар да студентлар отрядлары составында эшли алачак.

Һөнәргә укыту кысаларында Чистай авыл хуҗалыгы техникумында эретеп ябыштыру эше буенча дәресләр уза. Ике ай дәвамында егетләрне эш нигезләренә һәм нечкәлекләренә өйрәтәчәкләр. Төркем 15 егеттән тора. Алар техникумда көндезге бүлектә эретеп ябыштыручы һөнәренә бәйле булмаган белгечлекләргә: кемдер моторист, кемдер судно йөртүче, кемдер электромонтерга укый. Димәк, һәр егетнең документаль рәвештә расланган өстәмә белгечлеге булачак.

Остаханәдә практик өлешкә керешкәнче, студентлар җитди өйрәнү үтәләр. Шунысын да билгеләп үтәргә кирәк, куркынычсызлык техникасына зур игътибар бирелә: яшь эретеп ябыштыручыларның аякларында махсус аяк киеме, алар эссегә чыдам костюмнардан, куллары перчаткалар (краглар), ә битләре махсус битлек белән саклана.

Остаханәдә процесс белән күпьеллык стажы булган педагог Александр Тарасов җитәкчелек итә. Ул егетләрнең игътибарын җайланмаларны эретеп ябыштыру эшләренә әзерләүгә һәм эретеп ябыштыру җөйләренең дөреслегенә юнәлтеп кенә калмыйча, студентларны чын ир-егетләр булырга: тирә-юньдәгеләр белән үзләрен лаеклы тотарга, ышанычлы кулдашлар һәм намуслы эшчеләр булырга өйрәтә.

Төркем белән шулай ук эретеп ябыштыру эше укытучысы Любовь Зазнобина эшли. Егетләр белән уртак телне ул беренче дәрестән үк тапкан. Үз студентларын мактый, төркемдә үзара хөрмәт хөкем сөрә.

– Безнең уку йорты электр белән эретеп ябыштыручы һөнәре буенча бушлай әзерләүгә грант отты. Егетләр остаханәгә көндезге дәресләрдән соң, буш вакытларында киләләр. Монда көн саен диярлек 4 сәгатькә якын вакыт үткәрәләр. Укуны тәмамлагач, алар кул белән дугалы эретеп ябыштыруның электр белән эретеп ябыштыручысы квалификациясе буенча дәүләт үрнәгендәге таныклык алачаклар. Әлеге эшче һөнәрне үзләштерүгә һәркемнең потенциалы һәм теләге бар, бу әлбәттә, сөендерә: эретеп ябыштыру эшен белү тормышта һәрвакыт кирәге чыга, – дип саный Любовь Леонидовна.

123нче төркем студенты Руслан Таһиров техникумда «Авыл хуҗалыгы предприятиеләрен электрлаштыру һәм автоматлаштыру» белгечлеге буенча белем ала. Бу курсларга эретеп ябыштыручы белгечлегенә ихтыяҗ булганлыктан килгән.

– Курслардан соң өченче разрядлы электр белән эретеп ябыштыручы булачакмын. Алга таба бу рәсми рәвештә эшкә урнашу өчен тагын бер мөмкинлек. Дәресләргә бер айга якын йөрим, эретеп ябыштыру эшенең кайбер нечкәлекләренә өйрәндем инде. Эш вакытында куркынычсызлык техникасын һәм цехларда үз-үзеңне тоту кагыйдәләрен беләм. Әлеге һөнәргә өстәмә өйрәнү тәкъдимен кабул итүемә бер дә үкенмим, – дип безнең белән уртаклаша Руслан.

Аның төркемдәше Кирилл Симаков кайчан да булса кулына электр белән эретеп ябыштыру җайланмаларын алачагын уйламаган да. Курсларга чакыргач, кызык өчен язылырга булган. Ә хәзер ул бу эшкә тартылуын аңлый.

– Эшче һөнәрләр, бигрәк тә эретеп ябыштыручылар, һәрвакыт кирәк. Иң мөһиме, эшкә җаваплы карарга һәм ашыкмаска. Дәресләр вакытында ярымай рәвешендә, нокталар белән эретеп ябыштырырга өйрәндем. Көннән-көн яхшырак эшләвемне күрәм, – ди Кирилл.

Эретеп ябыштыру технологияләре буенча остаханәдә студентлар өчен махсус кабиналар һәм эретеп ябыштыру җөйләренең сыйфатын контрольдә тоту өчен коллектив зона җиһазландырылган. Бирегә һөнәри белем бирү кысаларында шөгыльләнүче студентлар гына түгел, ә мәшгульлек үзәгендә теркәлгән кешеләр, шулай ук өч елдан да ким булмаган эш стажы булган эретеп ябыштыручылар квалификациясен күтәрү өчен дә килә. Тиздән авыл хуҗалыгы техникумында кирәкле җиһазлар белән җиһазландырылган яңа остаханә эшли башлаячак.

Алда егетләрне тагын бер айлык өйрәнүләр көтә. Вакыт аз булса да, укытучылар төп белемнәрне студентларга тулысынча бирәчәкләренә ышаналар.