Дәүләт Думасы депутаты Олег Морозов район үсешен бәяләде һәм халык белән очрашты

Төбәк атналыгы кысаларында Дәүләт Думасының контроль комитеты рәисе Олег Морозов Чистай районында булды. Депутат җирле халык белән аралашты, җитештерү мәйданчыгында булды һәм партия десанты составында халык программасы объектын карады.

Район активы белән әңгәмәне «Чистай» мәдәни үзәгендә оештырдылар. Анда муниципалитет, җәмәгать һәм эшлекле даирә вәкилләре дә катнашты. Территорияләрне үстерү перспективалары турында фикер алыштылар.

– Бүген без хакимиятнең барлык дәрәҗәләрендә бергәләп эшләүне таләп итә торган мөһим бурычларны билгеләдек. Чистай районы зур потенциалга ия – аны дөрес тормышка ашырырга кирәк, – дип белдерде Олег Морозов.

Очрашуда катнашучылар парламентарийга үзләрен борчыган сорауларны бирделәр. Алар пенсия яшенең артуына, җәйге вакытка күчүгә, торак-коммуналь хуҗалык тарифлары күләменә һәм башка социаль әһәмияткә ия темаларга кагылды.

«Бердәм Россия» җирле бүлекчәсенең кабул итү бүлмәсендә Олег Морозов гражданнарны шәхсән кабул итте. Үтенечләрнең берсе районда милләтара тынычлыкны ныгытуга юнәлдерелгән «Безнең күпмилләтле Татарстаныбыз» проектын гамәлгә ашыруда ярдәм итүгә кагылды. Җирле халык депутатка һәм аның хезмәттәшләренә «Безнең ишегалды» программасы өчен рәхмәт белдерде, аның ярдәмендә шәһәрдә һәм районда йорт яны территорияләрен тәртипкә китерделәр.

Исегезгә төшерәбез, 2019 елда «Безнең ишегалды» программасын булдыру инициативасы белән «Бердәм Россия» чыккан иде. 2020 елда аны ТР Президенты Рөстәм Миңнеханов (2023 елдан – ТР Рәисе) кушуы буенча эшләтеп җибәрделәр. Узган ел гына да муниципаль районда 15 ишегалды яңартылган: асфальт алыштырылган, эскәмияләр, урналар, яктырткычлар куелган һәм балалар мәйданчыклары ясалган. Агымдагы елда 33 йорт яны территориясен төзекләндерү планлаштырыла.

Моннан тыш, депутат Чистайда 2003 елда нигез салынган «Яңа технологияләр» предприятиесендә дә булды. Компания нефть чыгару өчен җайланмалар эшләп чыгару һәм аларга сервис хезмәте күрсәтү белән шөгыльләнә. Олег Морозов җитештерү куәтләрен карады, җитәкчелек белән җитештерүчәнлекне үстерү өчен перспективалар һәм дәүләт ярдәме турында сөйләште.

Партия десанты составында ул шулай ук 1986 елдан бирле эшли торган Татар Сарсазы мәктәбендә дә булды. Биредә 29 бала укый. Хәзер 1,5 мең кв. метр мәйданлы бинада капиталь ремонт бара. Инженерлык челтәрләре тулысынча алыштырылган, түбәсе төзекләндерелгән. Эшчеләр сыйныфларны яңарталар, тәрәзәләрне алыштыралар. Мәктәптә навигация барлыкка киләчәк. Шулай ук җиһазлар һәм спорт кирәк-яраклары яңартылачак. Эшләрне агымдагы елның августында тәмамларга ниятлиләр.

Парламентарий ремонт темпларын һәм сыйфатын бәяләде, җаваплы затлар белән эш графигы һәм өстәмә ярдәм чаралары турында сөйләште.

Олег Морозов эшлекле сәфәрнең нәтиҗәле булуын белдерде. Аның сүзләренә караганда, очрашулар барышында район үсешенең актуаль бурычларын карау, проблемаларны хәл итү юлларын табу, кешеләрнең тормыш сыйфатын күтәрүгә юнәлдерелгән инициативаларны хуплау мөмкин булды.

– Мин Чистай районы халкына ачык һәм конструктив диалог өчен рәхмәтлемен. Без мөһим тәкъдимнәрне ишеттек һәм аларны федераль дәрәҗәдә эшләргә әзер. Уртак тырышлык белән без территорияне үстерүдә яңа уңышларга ирешербез дип ышанам, – дип билгеләп үтте Олег Морозов.