Чистайлылар дамбаны тәртипкә китерү өчен берләштеләр

Шәһәр халкының иң яраткан ял итү урыннарының берсе булган дамбада «Чиста яр буе» язгы өмә узды. Чарада төрле яшьтәге битараф булмаган кешеләр, шул исәптән гаиләләр дә катнашты. Акцияне биоресурслар буенча ТР Дәүләт комитеты хезмәткәрләре 7нче «Елгачылар поселогы» ТҖС белән берлектә оештырдылар.
— Чарада катнашучыларның күп булуы сөендерә, — дип билгеләп үтте «Чиста болыннар» табигать тыюлыгы башлыгы Максим Улыбин. — Безнең максат яр буен чистарту гына түгел, ә табигатьне саклауның мөһимлеген шәхси мисалда күрсәтү. Өмәдән соң кешеләр бирегә килеп, туган ягыбызның матурлыгына һәм мондагы чисталыкка соклана алачаклар.
Аеруча табигатьне яшь саклаучылар — Дәүләт комитеты каршындагы экология отрядында катнашучылар активлык күрсәттеләр. Алар арасында кадет интернат-мәктәбенең бишенче сыйныф укучысы Рәсил Гыйниятов та бар иде:
— Мин яраткан ял итү урыныбызны тәртипкә китерергә килдем. Яшьтәшләремә шуны искәртәсем килә: үз артыңнан җыештыру — ул гадәти күренешкә әйләнергә тиеш. Әгәр һәркем үз өлешен кертсә, шәһәр күпкә гүзәлрәк булыр иде.
Уртак тырышлык нәтиҗәсендә берничә тонна чүп-чар җыелды. Активистлар җыештыру белән генә чикләнмәделәр — алар сыерчык оялары урнаштырдылар, дамбада яшәүче канатлы дусларыбыз өчен яңа «йортлар» булдырдылар.
Өмә кечкенә, ләкин бердәм гамәлләр безнең тирә-юнебезне үзгәртергә сәләтле булуын тагын бер кат исбат итте.