Чистайлы кыз белән танышырга теләгән, ләкин акчасын югалткан

21 яшьлек ир-егет танышу сайтында мошенниклык схемасы корбаны булган. Танышырга теләп, ул мессенджердагы каналда табылган платформада теркәлгән һәм үзен кызыксындырган кыз белән языша башлаган.
Яңа танышы яшь кешегә юмористик концертка барырга тәкъдим иткән һәм үз ниятләрен раслау сыйфатында янәсе үзе сатып алган билетның скриншотын, шулай ук аңа билет сатып алу өчен сылтама җибәргән. Вакыйгаларның тиз баруы белән илһамланып, егет күрсәтелгән сылтама буенча күчкән һәм түләүне QR-код ярдәмендә башкарган.

Банк картасыннан 3050 сум күләмендә акча күчерелүгә карамастан, сайт хата турында хәбәр биргән һәм билет бирелмәгән. Шуннан соң кыз белән аралашу тукталган, ул егетне блокка куйган.

Мошенниклар корбаны булуын аңлап, егет полициягә гариза белән мөрәҗәгать иткән. Россия Эчке эшләр министрлыгының Чистай районы буенча тикшерү бүлеге тикшерүчесе тарафыннан РФ Җинаятьләр кодексының 159нчы маддәсе – «Мошенниклык» буенча җинаять эше кузгатылган.
Полиция хезмәткәрләре гражданнарны интернетта танышканда һәм онлайн-түләүләр башкарганда уяу булырга чакыра. Мошенниклар корбаны булмас өчен сайтларның дөреслеген җентекләп тикшерергә һәм шикле сылтамалар буенча күчмәскә кирәк.