Чистайда узган киңәшмәдә гадәттән тыш хәлләр министрлыгының эше, урып-җыю кампаниясе барышы һәм оператив хәл турында сөйләштеләр

Гадәттән тыш хәлләр министрлыгының норматив-хокукый актлары йөз процентка үтәлгән

Татарстан Республикасы Гадәттән тыш хәлләр министрлыгының Чистай районы буенча бүлегенең 2023 елның беренче яртыеллыгында башкарган эше турындагы доклад белән аның җитәкчесе Валерий Сироткин чыгыш ясады. Ул хәбәр иткәнчә, ведомство тарафыннан хисап чорында Россия гадәттән тыш хәлләр министрлыгының гражданнар оборонасы һәм халыкны яклау өлкәсендә тәкъдим ителгән норматив-хокукый актлар 100 процентка үтәлгән. Гадәттән тыш хәлләр министрлыгы хезмәткәрләре гидротехник корылмаларны, язгы ташу вакытында муниципаль район территориясен һәм су басуларга әзерлекне, кышкы һәм җәйге чорларда су объектларында кешеләрнең иминлеген тәэмин итүне, шулай ук кышкы җылыту чорының аварияләрсез үтү чараларын тикшерүдә катнашканнар.

Валерий Александрович сүзләренә караганда, график нигезендә, агымдагы елның февралендә Чистай районы территориясендә хәбәр итү системасының техник торышына бәя бирелгән. Хисап материаллары Татарстан Республикасы Гадәттән тыш хәлләр министрлыгына җибәрелгән. Доклад ясаучы шулай ук районда гражданнар оборонасы максатларында матди-техник, азык-төлек, медицина һәм башка чаралар запасларын булдыру буенча эш оештырылуы турында сөйләде.

98 мең тонна ашлык суктырылган

Агросәнәгать комплексында эшләрнең торышы турында авыл хуҗалыгы һәм азык-төлек идарәсе начальнигы Александр Ромадановский хәбәр итте. Район кырларында урып-җыю кампаниясе дәвам итә. Уңай һава шартлары хуҗалыкларга максималь җитештерүчәнлеккә чыгарга мөмкинлек бирә. Доклад ясалган датага тулаем район буенча 35 мең гектардан артык мәйданда ашлык җыеп алынган — бу план күрсәткечләренең 70 проценты, 98 мең тоннага якын бөртек суктырылган. Уртача уңыш һәр гектардан 27,7 центнер. Иң күп мәйданнар «Чистай» агрофирмасында, «Волга-Селект», «Чистай-Агро» хуҗалыкларында суктырылган. Бәрәңге казу дәвам итә, ул 45 гектар мәйданда җыелган, бу утыртылган мәйданнарның 8 процентын тәшкил итә, 1750 тонна җыеп алынган. Уртача уңыш һәр гектардан 379 центнер тәшкил итә. Урып-җыю эшләре белән беррәттән, кайбер хуҗалыкларда уҗым культураларын чәчүгә керештеләр.

Бер атна эчендә авыл хуҗалыгы предприятиеләрендә 337 тонна сөт савылган, шуның 320 тоннасы сатылган.

5 машина йөртүче исерек килеш тоткарланган

Узган атнадагы оператив хәл турында Россия Эчке эшләр министрлыгының Чистай районы буенча полиция бүлеге начальнигы урынбасары Антон Ерашов хәбәр итте. Бер атна эчендә җинаятьләр турында 9 хәбәр теркәлгән. Алар арасында: компьютер мәгълүматларына законсыз керүнең, административ күзәтчелекне бозуның берәр очрагы, җинаять җаваплылыгына тартылган кешенең юл хәрәкәте кагыйдәләрен бозуы, шулай ук 2 мошенниклык һәм 4 урлашу. 18 юл-транспорт вакыйгасы килеп чыккан, аларда 3 кеше төрле авырлыктагы имгәнүләр алган, бер машина йөртүче авария урыныннан качкан.

Барлыгы 260 кеше административ җаваплылыкка тартылган, шуларның күбесе (211) — юл хәрәкәте кагыйдәләрен бозган өчен, шул исәптән 5 машина йөртүче транспорт чарасы белән исерек килеш идарә иткән өчен тоткарланган.