Чистайда территориаль җәмәгать советында халык белән эшләү, авыл хуҗалыгында эшләрнең барышы һәм оператив хәл турында сөйләштеләр

Халыктан кире элемтә бар
«Сәгать заводы поселогы» 2нче территориаль җәмәгать үзидарәсендә халык белән эшне активлаштыру турында аның җитәкчесе Ольга Добронравова сөйләде.
Ул бу вазифага агымдагы елның июнендә кереште. 2нче ТҖС территория һәм халык саны буенча шәһәрдә иң зурысы. Халык белән эшне активлаштыру өчен территория шартлы рәвештә 8 микро-йортка бүленгән. «Восток» мәдәни-ял итү үзәге бинасына капиталь ремонт ясалу сәбәпле, ТҖСның әлегә үз бинасы юк. Шуңа күрә халык белән аралашу һәм очрашулар өчен төрле эш формалары: алда торган чаралар турында белдерүләр урнаштыру, 16нчы мәктәп белән тыгыз элемтәдә тору, шулай ук фатир саен йөреп чыгу кулланыла.
Халыктан кире элемтә бар: микрорайонда яшәүчеләр шалтыраталар, мессенджерларда хәбәрләр җибәрәләр, хатлар язалар, очрашканда үзләренең проблемалары һәм тәкъдимнәре турында сөйлиләр. ТҖС үткәргән чараларга мәгариф оешмалары, мәдәният учреждениеләре, аның территориясендә урнашкан скверлар җәлеп ителә. Июньнән сентябрьгә кадәр өлкәннәр һәм балалар өчен бик күп чаралар үткәрелгән.

Бәрәңге алу төгәлләнде
Агросәнәгать комплексы предприятиеләренең эше турында авыл хуҗалыгы һәм азык-төлек идарәсе башлыгы Александр Ромадановский хәбәр итте. Хуҗалыкларда соңгы культуралар, шул исәптән көнбагыш җыю эшләре төгәлләнеп килә. Бүгенге көнгә бу культура планлаштырылган мәйданның 97 процентында җыеп алынган. 14 мең тоннага якын суктырылган, уртача уңдырышлылык һәр гектардан 22 центнер тәшкил итә. Шулай ук узган атнада бөртеккә кукурузның шактый өлеше җыеп алынган, уңдырышлылык һәр гектардан 102 центнер тәшкил итә.

Узган атнада бәрәңге алу төгәлләнгән, 30 мең тоннадан артык казып алынган, уртача уңдырышлылык һәр гектардан 466 центнер тәшкил итә. Кишер алу дәвам итә, планлаштырылган мәйданның 77 процентында эшләр башкарылган. Чөгендерне казып алу эшләре дәвам итә.
Хуҗалыкларда шулай ук туфрак эшкәртү буенча да эш алып барыла.
Узган атнада 360 тонна сөт савылган, 342 тонна сатылган.

Юлларда 30 юл-транспорт вакыйгасы килеп чыккан
Узган атнадагы оператив хәл турында Россия Эчке эшләр министрлыгының Чистай районы буенча бүлеге начальнигы урынбасары Антон Ерашов хәбәр итте. Хисап чорында җинаятьләр турында 8 хәбәр теркәлгән. Сводкада — талау, мошенниклык, банк картасыннан акча урлау һәм башка җинаятьләр.

Шәһәр һәм район юлларында 30 юл-транспорт вакыйгасы килеп чыккан, аларда ике кеше һәлак булган, дүрт кеше төрле дәрәҗәдәге имгәнүләр алган. 171 кеше административ җаваплылыкка тартылган, шуларның 145е — юл хәрәкәте кагыйдәләрен бозган, шул исәптән 3 машина йөртүче руль артына исерек хәлдә утырган.

Мөлкәт салымнарын түләү вакыты якынлаша
Азакта Дмитрий Иванов киңәшмәдә катнашучыларга милек салымнарын түләү чоры башлануын искәртте. Муниципаль район башлыгы моны билгеләнгән срокларда эшләргә кирәклеген ассызыклады.