Чистайда Гаилә, мәхәббәт һәм тугрылык көнендә гаилә парларын хөрмәтләделәр

Скарятин бакчасында Гаилә, мәхәббәт һәм тугрылык көнендә җылы һәм күңелле концерт булды. Күпләр бәйрәмгә балалары, әти-әниләре, әби-бабалары белән килгәннәр иде. Тамашачылар урыннарны концерт башланганчы ук ала башладылар. Барысына да бәйрәмнең күңелне нечкәртерлек символы – ромашка рәвешендәге брошкалар бүләк иттеләр.

Тантаналы өлешне Чистай муниципаль районы башлыгы Дмитрий Иванов ачты. Ул барлык җыелучыларны шушы якты көн белән котлады һәм якташларына ихлас сүзләр белән мөрәҗәгать итте:

– Нык гаилә – ул дәүләтнең, җәмгыятьнең нигезе, һәр кешенең терәге, – диде Дмитрий Алексеевич. – Мәхәббәтсез яшәү, аралашу, иҗат итү мөмкин түгел. Мәхәббәт – күңелебезнең йөрәге ул. Ә үзеңә, туганнарыңа, якыннарыңа, үз илеңә тугрылык безне көчлерәк итә. Бу өч төп өлеш һәркемнең тормыш юлында булсын. Безнең районда 40, 50, 60 ел бергә яшәүче искиткеч парлар шактый. Алар барысы өчен дә яхшы үрнәк. Һәр гаиләдә гармония, үзара аңлашу, мәхәббәт хөкем сөрсен, балаларыгыз, оныкларыгыз сөендерсен, ә ялгызларның үз парларын табуларын телим! Бәйрәм белән!

Бу кичне сәхнәгә үлгәннән соң бүләккә лаек булган махсус хәрби операциядә катнашучыларның туганнарын һәм якыннарын чакырдылар. Район башлыгы Дмитрий Николаевич Гурьяновның Батырлык орденын сугышчының әбисе Антонина Петровна Гурьяновага тапшырды. Бу бүләк сугышчыга хәрби бурычын үтәгәндә күрсәткән батырлыгы, фидакарьлеге өчен бирелгән.

Жуков ордены Артур Марс улы Фәсхетдиновның хатыны Татьяна Евгеньевна Фәсхетдиновага тапшырылды. Сугышчы әлеге бүләккә хәрби бурычларны намуслы үтәгәне, аның командалыгындагы шәхси состав күрсәткән батырлык һәм каһарманлык өчен лаек булган.

Дмитрий Иванов геройларның туганнарының кайгысын уртаклашты һәм сугышчыларның батырлыклары өчен тирән рәхмәт белдерде.

Программада дистә еллар дәвамында мәхәббәт һәм тугрылык үрнәге булган гаиләләрне хөрмәтләү аерым урын алды. Любовь Николаевна һәм Владимир Иванович Зайцевлар ярты гасырдан артык бергә. Ангелина Георгиевна һәм Евгений Николаевич Черножуковлар алтын туйларын быел гыйнвар аенда билгеләп үткәннәр. Озак еллар бергә гомер иткән бу парларның һәркайсы «Мәхәббәт һәм тугрылык өчен» медале белән бүләкләнде.

Олы Талкыш авылыннан Игнашиннар гаиләсенә карата да җылы сүзләр әйтелде. Вячеслав Витальевич һәм аның хатыны Нина Васильевна инде 40 елдан артык бәхетле яшиләр һәм аларның үрнәге – чын мәхәббәтнең вакыттан курыкмавының тагын бер дәлиле.

Район башлыгы парларга чәчәкләр һәм истәлекле бүләкләр тапшырды. Ә җавап итеп алар нык гаиләнең төп серләрен теләп ачтылар, болар – хөрмәт, кайгыртучанлык, бер-береңне ишетә белү һәм, әлбәттә, еллар узган саен ныгый гына бара торган мәхәббәт.

Барысын да бәйрәм белән котларга Чистай епархиясе сәркатибе Виктор Тихонов һәм «Әнәс» мәчете имам-хатыйбы Әбүбәкер хәзрәт Азизов килделәр. Аларның гаилә учагының кыйммәте турындагы сүзләре бәйрәмгә килгән һәркемнең йөрәгендә яңгыраш тапты.

Мәдәни-ял итү үзәге артистларының чыгышы кичәнең якты аккорды булды. Алар җырлар һәм музыкаль котлаулар белән тулы җылы концерт программасы әзерләгәннәр. Ә теләүчеләр өчен интерактив мәйданчыклар эшләде: теләгән һәркем мастер-класста ромашкадан такыя үреп, тематик фотозоналарда истәлеккә фото ясый алды.

Г. Гомәрова фотосы