Чистайда депутатлар шәһәр башкарма комитеты эше һәм бюджеттагы үзгәрешләр турындагы хисапны расладылар

Көн тәртибендәге беренче мәсьәлә 2025 елда шәһәр башкарма комитеты эше һәм 2026 елга планнары турында хисап булды. Доклад белән шәһәр башкарма комитеты җитәкчесе урынбасары Сергей Плотников чыгыш ясады.

Ул ассызыклаганча, эшләренең төп бурычы – халык тормышы өчен уңайлы мохит булдыру. Бүген шәһәрдә 59 меңнән артык кеше яши, анда гомуми озынлыгы 227 километрдан артык булган 289 урам бар.

Сергей Плотников юл-урам челтәрен, тротуарларны ремонтлау, урамнарны яктырту буенча эшләр, «Безнең ишегалды» республика программасын гамәлгә ашыру турында җентекләп сөйләде.

Ул экология мәсьәләләренә дә кагылды. Шәһәрдә 229 контейнер мәйданчыгы бар, аларда 448 контейнер урнаштырылган. Бер ел эчендә 23 мең тоннага якын каты коммуналь калдыклар һәм 2,3 мең тоннадан артык эре габаритлы чүп-чар чыгарылган. Яз һәм көз айларында чәршәмбе һәм шимбә өмәләре, шул исәптән Чулман ярын чистарту буенча эшләр үткәрелгән. Авария хәлендәге агачларны кисү, шулай ук сукбай хайваннарны тотып алу эшләре башкарылган.

Гражданнар мөрәҗәгатьләре белән эшләү мөһим юнәлеш булып кала. 2025 елда шәһәр башкарма комитетына 700дән артык мөрәҗәгать, шул исәптән хатлар һәм телдән гаризалар, шулай ук шәһәр зиратларында җирләү урыннарын теркәү буенча 647 мөрәҗәгать кергән.

– Мөрәҗәгатьләрнең күбесе урынга чыгып тикшерелә. 2026 елда бу практиканы дәвам итәчәкбез, җавапларның сыйфатына, аларның нигезлелегенә һәм вакытында булуына аерым игътибар бирәчәкбез, – дип ассызыклады шәһәр башкарма комитеты җитәкчесе урынбасары.

Агымдагы елга планда – урам-юл челтәрен ремонтлауны, территорияләрне тәртипкә китерүне, яңа җәяүлеләр кичүләрен төзекләндерүне һәм юл хәрәкәте иминлеген арттыру эшләрен дәвам итү.

Шулай ук депутатлар шәһәр Советының физик затлар мөлкәтенә һәм шәһәр бюджетына салым турындагы карарына үзгәрешләр кертү мәсьәләләре буенча фикер алыштылар. Көн тәртибенең бу ике пункты буенча финанс-бюджет палатасы җитәкчесе Наталья Карманова чыгыш ясады.

Барлык каралган мәсьәләләр буенча депутатлар бертавыштан раслау карарларын кабул иттеләр.