Чистайда балаларның транспорт чараларын куллануын контрольгә алуга багышланган зур ата-аналар җыелышы узды

Чистайда иң кискен темага – балигъ булмаганнарның мототехника, питбайк, электр самокаты һәм башка транспорт чараларын куллануын контрольгә алуга багышланган зур күләмле ата-аналар җыелышы узды. Анда ата-аналар комитеты вәкилләре, шәһәр һәм район мәктәпләре директорлары, ә онлайн күрсәтү ярдәмендә берничә йөз ата-ана һәм педагог катнашты.

Җыелышны район башкарма комитеты җитәкчесе һәм юл хәрәкәте иминлеген тәэмин итү комиссиясе рәисе Эдуард Хәсәнов ачып җибәрде. Соңгы еллардагы тенденция борчу тудыра, дип сүзен башлады ул. Балалар кулларына имгәнүгә китерергә мөмкин булган техниканы торган саен ешрак алалар һәм күп кенә әти-әниләр үз балаларына нинди бүләк биргәннәрен аңлап бетермиләр.

– Мопедлар, питбайклар, квадроцикллар, электр самокатлары –уенчыклар түгел. Хөрмәтле ата-аналар! Үз балаларыгызга үлемгә китерергә мөмкин булган бүләкләр биргәнче, яхшылап уйлагыз. Күпчелек ата-аналар үз балалары белән бернинди начарлык та килеп чыкмаячагына ышаналар. Ләкин һәр коры статистика артында – фаҗига, – дип мөрәҗәгать итте Эдуард Рөстәм улы бирегә җыелганнарга.

Чистай районы буенча Дәүләт автоинспекциясе бүлеге начальнигы Дмитрий Зинин үз чыгышында борчулы статистика китерде. Узган ел Татарстанда мототранспорт белән идарә итүче балалар катнашында 41 юл-транспорт вакыйгасы килеп чыккан. 40 кеше имгәнүләр алган, бер бала һәлак булган.

Үз чыгышын ул соңгы вакытта булган авария урыннарыннан фотосурәтләр һәм видеороликлар белән тулыландырып барды.

Ни кызганыч, Чистай районында быел яшь самокатчы катнашында юл-транспорт вакыйгасы килеп чыкты инде. Йолдыз поселогында 12 яшьлек малай электр самокатында юлны тиешсез урында кисеп чыккан һәм «Лада» автомобиле тәгәрмәчләре астына эләккән. Өстәвенә, ул анда шәһәрдән машиналар йөри торган юлдан килгән. Баланы имгәнүләр һәм җәрәхәтләр белән дәваханәгә салганнар. Ул исән калган, ләкин мондый очраклар кайчак күпкә куркынычрак тәмамлана.

Техника белән идарә иткәндә балалары зыян күргән ата-аналарны җаваплылыкка тартачаклар, дип ассызыкладылар җыелышта.

– Татарстанның Кайбыч районында беренче җинаять эше кузгатылган инде. Маддә – балигъ булмаганнарны хокукка каршы гамәлләр кылуга җәлеп итү һәм сәламәтлеккә авыр зыян китерү куркынычы тудырган транспорт чарасы белән идарә итү, – дип аңлатты Дмитрий Зинин.

Шулай ук Чистай үзәк район дәваханәсенең баш табибы Илдар Хәнифов чыгыш ясады. Ул балаларның аварияләр нәтиҗәсендә нинди авыр имгәнүләр алуы һәм табибларның аларның гомере өчен ничек көрәшүләре турында сөйләде.

Нәтиҗә ясап, Эдуард Хәсәнов тагын бер тапкыр ата-аналарга мөрәҗәгать итте:

– Балаларыбызның иминлеге – һәр олы кешенең көндәлек җаваплылыгы ул. Без тыярга гына түгел, ә аңлатырга, контрольдә тотарга һәм, иң мөһиме, юлларда үз-үзеңне җаваплы тотуның дөрес үрнәген күрсәтергә тиешбез.

Мондый җыелышлар районда гадәткә керде инде. Беренчесе узган ел җәйге каникуллар алдыннан үткән иде. Практиканы Дәүләт автоинспекциясе хезмәткәрләре һәм педагоглар катнашында профилактик рейдлар кебек үк дәвам итәргә карар кылынды.