Чистай укучыларына су исәпләгечләрне ничек җитештерүләрен күрсәттеләр

16нчы номерлы мәктәп укучылары «Бетар» предприятиесендә булдылар.  Алар өчен профориентация экскурсиясен Чистай районы буенча «Россиядә эш» кадрлар үзәге хезмәткәрләре оештырды. Әлеге чара яшьләрне маршрутлаштыру проектын тормышка ашыру кысаларында үтте. Бу хакта учреждениенең социаль челтәрдәге аккаунтында хәбәр ителә.

Укучыларга су исәпләгечләрне җыю цехларын күрсәттеләр.  Укучылар үз күзләре белән исәпләү приборларын ясауның тулы циклын – беренче сызымнардан алып әзер әйберләрне җыю эшләрен күрделәр.

Предприятиедә кунакларга төгәллекнең һәм сыйфатның эштә ни өчен мөһим роль уйнавы турында да сөйләделәр: моңардан су исәпләгечләрнең эш нәтиҗәсе генә түгел, ә менә ресурсларны рациональ файдалану да тора.

Экскурсия вакытында инженер күнекмәләренең  мөһимлегенә аерым  басым ясадылар. Укучыларга график сурәтләрне уку һәм ясый белүнең  заманча югары технологияле җитештерүдә уңышлы карьераның базасы булуын аңлаттылар.

Моңардан тыш, укучылар заманча станоклар белән таныштылар һәм гадәти әзерлек вакытындагы әйбернең әзер детальгә әверелүен күзәттеләр. Шулай ук бүгенге базар шартларында аеруча кирәкле булган эшче һөнәрләре белән танышу да укучыларда зур кызыксыну уятты.

Оештыручылар әйтеп үткәнчә, мондый экскурсияләрнең төп максаты – үсеп килүче буынга  сәнәгать предприятиеләрендә эшләүнең абруйлы, кызыклы һәм перспективалы икәнен күрсәтү. Кем белә, бәлки укучыларның әлеге сәяхәте киләчәк һөнәрләрен сайлауда тәүге адымнары булыр.