Чистай районында Җиңү көнен бәйрәм итүгә бәйле рәвештә иминлек чараларын көчәйтәчәкләр

Чистай районында террорчылыкка каршы комиссиянең, гадәттән тыш хәлләрне кисәтү һәм бетерү, янгын иминлеген тәэмин итү комиссияләренең һәм оператив төркемнең уртак утырышы булды. Киңәшмәне район башкарма комитеты җитәкчесе Эдуард Хәсәнов алып барды.

Көн тәртибенә берничә пункт кертелгән иде. Җиңү көненә әзерлек һәм аны уздыру вакытында иминлек төп мәсьәлә булды. Бу темага доклад белән Эчке эшләр министрлыгы бүлегенең полиция (җәмәгать тәртибен саклау) башлыгы урынбасары Василий Кузьмин чыгыш ясады.

Кешеләр күпләп була торган барлык урыннарны хезмәт этләре белән кинологлар тикшерә, шуннан соң аларны эчке эшләр хезмәткәрләре сак астына алачак, дип билгеләп үтелде. Шәһәрнең үзәк мәйданында һәм Скарятин бакчасында җәмәгать иминлеген тәэмин итү өчен контроль-үткәрү пунктлары җиһазландырылачак: халыкка керү бары тик шулар аша гына гамәлгә ашырылачак. Моннан тыш, ул квадрокоптерларны куллану тыелган, дип ассызыклады.

Василий Кузьминның өстәмә докладчысы булып Чистай районы буенча күзәтчелек эшчәнлеге һәм кисәтү эше бүлеге начальнигы урынбасары Руслан Сафиуллин чыгыш ясады. Ул билгеләп үткәнчә, бәйрәм чараларын уздыру урыннары исәпкә алынган, бу объектларда профилактик тикшерүләр уздырылачак. Җаваплы затлар янгын куркынычсызлыгы чаралары буенча өстәмә инструктажлар узачаклар, алар барышында гадәттән тыш хәл очрагында кешеләрне тиз һәм куркынычсыз эвакуацияләү мәсьәләләренә аерым игътибар биреләчәк. Бәйрәм көнендә фейерверк җибәрү белән шөгыльләнәчәк оешма белән шулай ук янгын иминлеген тәэмин итү белән бәйле барлык мәсьәләләр дә эшләнәчәк.

Моннан тыш, Руслан Сафиуллин утырышта катнашучыларга Татарстанда 25 апрельдән 11 майга кадәр гамәлдә булган янгынга каршы махсус режим турында искәртте. Бу чорда учак ягу, коры үлән һәм чүп-чар яндыру, ачык утта ризык әзерләү тыела. Тыюга шулай ук теләсә нинди пиротехниканы эшләтеп җибәрү дә керә.

Иминлекне тәэмин итү һәм бәйрәм чараларын уздыруга әзерлек буенча күрелгән чаралар турында шәһәр башкарма комитеты җитәкчесе Айрат Хамматов сөйләде. Ул хәбәр иткәнчә, Җиңү көнендә транспорт чаралары өчен хәрәкәт шәһәрнең берничә үзәк урамында ябылачак – чикләүләр иртәнге 7дән 21 сәгатькә кадәр гамәлдә булачак.

Шулай ук Айрат Хамматов билгеләп үткәнчә, биналарда, корылмаларда һәм башка конструкцияләрдә буяу ярдәмендә ясалган мыскыллы яки провокацион характердагы язулар табылган очракта, торак-эксплуатация учреждениесе хезмәткәрләре кичекмәстән аларны бетерү буенча чаралар күрәчәкләр.

Моннан тыш, үзәк мәйдан һәм Скарятин бакчасы шартлау локализаторлары белән тәэмин ителәчәк.

Террорчылык идеологиясен һәм башка деструктив агымнарны таратуга каршы тору буенча мәгълүмати-пропаганда эшенең торышы, шулай ук аны камилләштерү чаралары турында шәһәр башлыгы урынбасары һәм террорчылыкка каршы комиссия каршындагы мәгълүмати-пропаганда төркеме җитәкчесе Михаил Ксенофонтов мәгълүмат бирде. Татар Ялтаны авыл җирлегендә экстремизмга каршы тору һәм миграция законнарын үтәү чараларының ничек гамәлгә ашырылуы турында җирлек башлыгы Гөлнара Әхмәдиева сөйләде.

Районның террорчылыкка каршы комиссиясе сәркатибе Ольга Заглядова террорчылык куркынычы дәрәҗәсен билгеләгәндә комиссиянең эш планын актуальләштерде.

Утырыш азагында Россия Федераль куркынычсызлык хезмәтенең Татарстан Республикасы буенча идарәсе башлыгы Рамил Нәҗмиев барлык җаваплы затларны бәйрәм чараларына әзерлек һәм аларны уздыру чорында контрольне көчәйтергә кушты. Ул шулай ук җитәкчеләргә террорчылык янаулары очрагына коллективларда өстәмә рәвештә эвакуацияләү тәртибен эшләргә киңәш итте.