Чистай районында «Язгы каникул»лар акциясе башланды

23 марттан 5 апрельгә кадәр Чистай районында, бөтен Татарстандагы кебек үк, «Язгы каникул»лар кисәтү акциясе уза. Чара балалар арасында юл-транспорт имгәнүләрен киметүгә юнәлдерелгән.

Чистай районы буенча Дәүләт автоинспекциясе бүлегендә хәбәр итүләренчә, акциянең төп бурычы – машина йөртүчеләргә, ата-аналарга һәм юл хәрәкәтендә яшь катнашучыларга юл йөрү кагыйдәләрен төгәл үтәүне искә төшерү.

2026 елның беренче ике аенда республика юлларында балалар катнашында 40 юл-транспорт вакыйгасы теркәлгән. Бу аварияләрдә бер бала һәлак булган, 45е төрле дәрәҗәдәге имгәнүләр алган. Зыян күрүчеләрнең күпчелеге автомобильләрдә пассажир сыйфатында булган.

– 12 яшькә кадәрге балаларны алгы утыргычта һәм 7 яшькә кадәрге балаларны арткы утыргычта йөртү бары тик баланың авырлыгына һәм буена туры килә торган балаларны тотып тору җайланмаларын кулланып башкарылырга тиеш, – дип искә төшерә Чистай районы буенча Дәүләт автоинспекциясе бүлеге начальнигы Дмитрий Зинин. – 12 яшькә кадәрге балаларны арткы утыргычта йөрткәндә дә тотып тору җайланмаларын кулланырга киңәш итәбез. 12 яшьтән өлкәнрәк пассажирлар иминлек каешын эләктерергә тиеш.

Бу таләпләрне бозу административ җаваплылыкка китерә. Ә иң куркынычы транспорт чарасында булган кешеләрнең иминлегенә һәм гомеренә яный. Дәүләт автоинспекциясе мондый хокук бозуларны ачыклау һәм булдырмау буенча актив эшне дәвам итәчәк.

Кисәтүнең тагын бер юнәлеше – җәяүле балалар иминлеге. Ел башыннан Татарстанда алар катнашында 18 юл-транспорт вакыйгасы килеп чыккан, аларда 18 бала имгәнгән. Мондый очракларны булдырмас өчен Дәүләт автоинспекциясе хезмәткәрләре Чистай районы буенча «Юл хәрәкәте иминлеге идарәсе» дәүләт-бюджет учреждениесе белгечләре белән берлектә кисәтү эшен көчәйтәчәкләр. Балигъ булмаганнар тарафыннан җибәрелгән бозулар турында мәгълүмат аңлату эшләре алып бару өчен мәгариф учреждениеләренә тапшырылачак.

– Барысына да – балаларга да, өлкәннәргә дә мөрәҗәгать итәм: юлларда бик игътибарлы һәм сак булыгыз. Хөрмәтле ата-аналар, үз балаларыгызның иминлегенә җитди карагыз. Аларны куркыныч тудырырлык урыннарда, бигрәк тә юллар янында, күзәтүсез калдырмагыз. Киемдәге яктылыкны кире кайтара торган элементлар турында кайгыртыгыз. Исегездә тотыгыз: балалар – юл хәрәкәтенең иң якланмаган катнашучылары, – дип ассызыклады Дмитрий Зинин.

Дәүләт автоинспекциясе хезмәткәрләре барлык юл хәрәкәтендә катнашучыларны кагыйдәләрне үтәргә, юлларда җаваплылык һәм үзара хөрмәт күрсәтергә чакыра.