Чистай районында яшәүчеләргә наркотикларның куркынычлылыгы турында искә төшерделәр

Барлык Россия буенча 1 – 30 июньдә үтүче наркотикларга  каршы юнәлеш Айлыгы кысаларында  Түбән Кондрата  авыл  китапханәсе китапханәчесе җирле  халык өчен   «Наркомания – куркыныч!» дип исемләнгән файдалы мәгълүмат сәгате үткәрде. Әлеге чара  ел саен 26 июньдә билгеләп үтелүче Халыкара  наркотиклар куллануга һәм аның законсыз әйләнешенә каршы көнгә багышланды.

Әлеге мәҗбүри булмаган, әмма җитди әңгәмәдә  китапханәче  катнашучыларга   наркотик матдәләрнең кеше организмына  ничек йогынты ясавы, психикада нинди үзгәрешләр барлыкка килүе һәм хәтта «эксперимент» дозасы да кеше язмышын аянычлы хәлләргә китерергә мөмкин булуы хакында сөйләде.

 «Без зур булмаган авылда яшибез,  шуңа күрә дә зур проблемалар безне читләп үтә кебек тоела. Әмма наркомания авылны да, шәһәрне дә аерып тормый. Әлеге афәт бу хәлләргә  күзен йомучы һәркемгә кагылырга мөмкин. Безнең бурыч – кисәтү, сөйләү, аңлату», – дип уртаклашты китапханәче.

Авыл халкы актив рәвештә әлеге әңгәмәгә кушылды:  якыннарыңда бәйлелекнең беренче билгеләрен ничек белергә, ярдәм сорап кая мөрәҗәгать итәргә  һәм аны кисәтүдә гаиләнең нинди роль уйнавы  турында  сораулар яңгырады.

Очрашу азагында  китапханәче  барысын да сәламәт яшәү рәвеше алып барырга, спорт һәм иҗат белән шөгыльләнергә өндәде – шул вакытта начар гадәтләргә вакыт калмаячак.