Чистай районында гомер итүче тыл хезмәтчәне Кәүсәрия Нургатинага 95 яшь тулды

ТР Хезмәт, халыкны эш белән тәэмин итү һәм социаль яклау министрлыгы матбугат хезмәтендә хәбәр итүләренчә, Кәүсәрия Әскәр кызы 1931 елның 9 мартында Чистай районының Татар Баганалысы авылында күп балалы крестьян гаиләсендә дөньяга килгән. 15 бала арасында ул иң кечкенәсе булган.

Сугыш чорына туры килгән ач-ялангач бала чагы

Нургатиннар гаиләсе бик ярлы яшәгән. Ачлык елларында алабута көлчәсе ашыйлар, кычыткан ашы пешерәләр. Беренче сыйныфка барырга вакыт җиткәч, кызның аяк киеме булмый, ул мәктәпкә яланаяк китә.

Бөек Ватан сугышы башланганда Кәүсәриягә ун яшь була, ул өлкәннәр белән беррәттән эшкә җигелә: чәчүдә, уңыш җыюда, терлек азыгы, утын әзерләүдә булыша, фермада сыер савучылар белән бергә эшли.

Хезмәт юлы: кошчылык фабрикасыннан туку фабрикасына кадәр

Сугыштан соң, җиде сыйныфны тәмамлагач, Кәүсәрия Нургатина җирле кошчылык фабрикасына эшкә урнаша. 1952 елда Костромага китә, анда туку фабрикасында эшли. Бер елдан соң кияүгә чыга, ике кыз һәм ике уллары дөньяга килә.

1961 елда ире вафат була, хатын-кыз балалары белән ялгыз кала. 1964 елда улы һәм кызы белән туган авылына кайта (калган ике баласы вафат була). Кабат кошчылык фабрикасына эшкә урнаша, лаеклы ялга чыкканчы шунда эшли. Лаеклы ялга чыкканнан соң да ветеран биш ел дәвамында фабрикада эшләвен дәвам итә, аннары эшчеләргә төшке аш әзерли. Кәүсәрия Әскәр кызы 78 яшькә кадәр үз хуҗалыгында хезмәт куя, печән әзерли, мал-туар асрый.

Бүләкләр һәм гаилә җылысы

Сугыш елларындагы фидакарь хезмәте өчен тыл хезмәтчәне Кәүсәрия Нургатина «1941-1945 еллардагы Бөек Ватан сугышында фидакарь хезмәте өчен» медале һәм юбилей медальләре белән бүләкләнгән.

Бүгенге көндә Кәүсәрия Нургатина кызы Сәрия Гомәр кызы тәрбиясендә яши. Улы Рамай Гомәр улы Казанда гомер итә. Аның дүрт оныгы һәм сигез оныкчыгы бар.

Татар Баганалысы авылында Нургатиннар гаиләсе лаеклы хөрмәткә ия. Авылдашлары тыл хезмәтчәненең хәлен белеп торалар.

Фотолар шәхси архивтан алынды