Чистай муниципалитетында узган аппарат киңәшмәсендә яшьләрне тәрбияләү, урып-җыю һәм иминлек турында сөйләштеләр

Анда катнашучыларның игътибар үзәгендә төп өч мәсьәлә: «Ватан» хәрби-патриотик эш һәм хәрби хезмәткә чакырылуга кадәрге яшьләрне әзерләү үзәге эшчәнлеге, агросәнәгать комплексындагы эшләрнең торышы һәм оператив вәзгыять булды.

7 патриотик һәм 8 спорт берләшмәсе эшли
«Ватан» үзәге эше турындагы доклад белән аның директоры Михаил Мунин чыгыш ясады. Ул билгеләп үткәнчә, районда яшьләрне патриотик тәрбияләү муниципаль программа нигезендә алып барыла. Төп тәрбияви бурычларның берсе — патриотик юнәлештәге чараларга җәлеп итү аша яшьләрнең әхлакый-патриотик сыйфатларын формалаштыру. 12 ел дәвамында «Ватан» үзәге районда яшьләр белән патриотик эшне оештыручы булып тора.
Үзәк каршында 7 патриотик һәм 8 спорт берләшмәсе эшли, аларда 133 кеше шөгыльләнә. Ел саен «Ватан» үзәге 5000нән артык бала һәм яшүсмерне үз эченә алган 117 патриотик чара үткәрә.
Михаил Сергеевич ассызыклаганча, үзәкнең эшчәнлеге спорт турнирларын оештыруны, һәлак булган сугышчылар истәлеген мәңгеләштерүне, Бөек Ватан сугышы елларында якташларыбызның батырлыгы турындагы истәлекне саклауны, эзләнү хәрәкәтен үстёрүне һәм яшьләрне армиядә хезмәт итүгә әзерләүне үз эченә ала.

Һава торышы начар булуга карамастан, урып-җыю эшләре дәвам итә
Агросәнәгать комплексындагы эшләрнең торышы турында авыл хуҗалыгы идарәсе башлыгы урынбасары Илгизәр Нуретдинов хәбәр итте. Һава торышы бозылуга карамастан, урып-җыю эшләре катлаулы шартларда да дәвам итә. Игенчеләр ашлыкка кукуруз, көнбагыш, бәрәңге, кишер һәм аш чөгендерен җыюны төгәллиләр. Туңга сөрү планлаштырылган мәйданның 68 процентында башкарылган, ә силос әзерләү кыраулар башланганнан соң төгәлләнәчәк.
Терлекчелектә узган атнада тулаем савым 406 тонна тәшкил иткән, шуның 372 тоннасы сатылган, сөтнең уртача бәясе бер килограмм өчен 40 сум 50 тиен. Бер сыердан уртача савым 20 килограмм тәшкил иткән.

Сводкада — 2 мошенниклык очрагы
Атналык оператив сводканы Россия Эчке эшләр министрлыгының Чистай районы буенча бүлеге начальнигы урынбасары Антон Ерашов тәкъдим итте. Узган атнада район территориясендә 3 җинаять теркәлгән. Сводкада — 2 мошенниклык һәм урлашу очрагы.
Юлларда 4 юл-транспорт вакыйгасы килеп чыккан, аларда 2 кеше зыян күргән. ЮХИДИ хезмәткәрләре юл хәрәкәте кагыйдәләрен бозган 78 кешене җаваплылыкка тартканнар, ә бер атна эчендә барлыгы 94 кеше административ җаваплылыкка тартылган.

Салым түләргә вакыт
Киңәшмәгә йомгак ясап, Эдуард Хәсәнов яшьләр белән эшне активлаштырырга, аларны ялгыз өлкән яшьтәге гражданнарга һәм махсус хәрби операциядә катнашучыларның гаиләләренә көнкүреш ярдәме күрсәтү эшенә җәлеп итәргә кушты.

Моннан тыш, ул җитәкчеләрнең игътибарын әйләнә-тирә территорияләрне коелган яфраклардан һәм чүп-чардан җыештырырга кирәклегенә юнәлтте һәм милек салымнарын түләү срокларын үтәүнең мөһимлеген искәртте.