Чистай интернатының «Шатлык остаханәсе»ндә җәйге үләннәрдән һәм хатирәләрдән келәм үрделәр

Хезмәт буенча инструктор Ирина Баранова анда яшәүчеләргә кыр чәчәкләреннән һәм үләннәрдән панно-келәм ясарга тәкъдим итте. Бу исә гади кул эше генә түгел, ә балачак иленә чын сәяхәт булды.

Барысы да саф һава суларга чыгудан башланды. Биредә тәрбияләнүчеләр күтәренке кәефтә булачак композицияләренә материал җыю өчен якын-тирәдәге болынлыкларга юнәлделәр. Яшел йомшак үлән өстеннән ясалган һәрбер адым елмаю һәм тере сөйләшүләргә этәрде: катнашучылар зур канәгатьләнү хисләре белән үзләренә балачактан таныш чәчәкләрне: тыйнак кына ромашкаларны, йомшак тукранбашларны, хуш исле башакларны искә төшерделәр. Букетлар тиз арада төрле җәйге үләннәр белән тулыланды, ә һавада – искиткеч табигатебезнең сулап туймастай хуш исләре...

Җәйге тыныч кичтә «Шатлык остаханәсе»ндә кызу эш кайнады. Агач рамга тукыма тарттырып үрү процессы башланды. Хуш исле үлән бәйләме кыр чәчәкләре бәйләме белән алышынды, бармаклар акрын гына төрле бизәкләр ясап, сабакларны үрделәр. Әлеге шөгыль белән вакытның узганы да сизелмәде: биредә тәрбияләнүчеләр үз тарихлары белән уртаклаштылар, балачакта ничек такыялар үрүләрен һәм гербарийлар җыюларын искә төшерделәр.

«Әлеге иҗат процессы өлкәннәрне берләштерде, балачакаларын искә төшерергә һәм аралашырга, истәлекләр белән уртаклашырга мөмкинлек бүләк иттте», – дип билгеләп үтте Ирина Баранова аларның көйләнгән эшләрен күзәтеп.

Әзер панно-келәм остаханәнең интерьерында лаеклы урын алачак. Хәзер ул бизәк кенә түгел, ә җылы җәйге көн турында тере искә төшереп тә торачак, кыр үләннәренең һәм чәчәкләренең тәмле исләре җәйге хатирәләрне саклаячак. Остаханәгә кергән һәркемгә ул тормышның дәвам итүен, ә аңарда иҗат, шатлыклар һәм күңел җылылыгы өчен һәрвакыт урын булуын искә төшереп торачак.