Чистай муниципалитетында көн тәртибендә: ковид чигенә, ярминкәләр башлана, язгы кыр эшләренә әзерлек бара

Чистай муниципаль районы башлыгының беренче урынбасары Константин Иванов аны онлайн-режимда алып барды.

Республикада ярдәм чаралары буенча ставкалар артты

Агросәнәгать комплексында эшләрнең торышы турында авыл хуҗалыгы һәм азык-төлек идарәсе башлыгы Александр Ромадановский сөйләде. Узган атнада 367 тонна сөт савылган, 10 миллион 800 мең сумлык 349 тонна сатылган, сөтнең уртача бәясе – бер килограмм өчен 31 сум. Бер сыердан уртача тәүлеклек савым 15,3 килограмм тәшкил итә.

Бер атна эчендә 27 баш бозау туган.

Александр Александрович авыл хуҗалыгы җитештерүчеләренә дәүләт ярдәме чаралары турында сөйләде. Мәсәлән, 2015 елдан башлап, республикада шәхси ярдәмче һәм фермер хуҗалыкларына ярдәм итүгә юнәлдерелгән берничә программа гамәлгә ашырыла. Аерым алганда, «Яңа эш башлаучы фермер» программасы буенча дәүләт ярдәме – 75 миллион сум, «Агростартап» программасы буенча 24,5 миллион сум күләмендә күрсәтелгән. Алардан шул рәвешчә 28 һәм 7 авыл хуҗалыгы җитештерүчесе файдаланган. Агымдагы елда шәхси ярдәмче хуҗалыкларга ярдәм итү республика чаралары буенча ставкаларны арттыру турында карар кабул ителгән, шулай ук товар һәм нәселле терлекләрне сатып алуга ставкалар арттырылган.

Язгы кыр эшләренә әзерлек план буенча бара.

Шәһәрдә кеше үтерелгән

Оператив хәл турында Россия Эчке эшләр министрлыгының Чистай районы буенча бүлеге башлыгы урынбасары Сергей Атуров хәбәр итте. Җинаятьләр турында барлыгы 20 хәбәр кергән. Сводкада – кеше үтерү, талау, наркотиклар сату, 1 ялган акча, 6 мошенниклык, 4 урлашу, 4 исерек килеш транспорт чарасы белән кабат идарә итү, 2 административ күзәтчелекне бозу очрагы.

20 юл-транспорт вакыйгасы килеп чыккан, аларда 5 кеше төрле дәрәҗәдәге тән җәрәхәтләре алган. Җәяүлене бәрдергәннәр. Юл хәрәкәте кагыйдәләрен бозган өчен 283 кеше тоткарланган, исерек килеш транспорт чарасы белән идарә иткән өчен – 4.

Административ хокук бозулар өчен 312 кеше тоткарланган, аерым алганда, җәмәгать урынында исерек хәлдә күренгән өчен – 13.

Вакытлыча оештырылган йогышлы авырулар госпиталенең күпчелек пациентлары – 60 яшьтән өлкәнрәкләр

Чистай үзәк район дәваханәсенең баш табибы Рәис Мостафин районда коронавирус инфекциясенә бәйле вәзгыять турында сөйләде.

– Ковид буенча хәл тыныч, – дип хәбәр итте Рәис Роберт улы. – Авыручылар саны сезон дәрәҗәсендә. Хәзерге вакытта госпитальдә 30 кеше дәвалана, шуларның 15е – чистайлы. Күбесе – 60 яшьтән өлкәнрәкләр.

Авыл хуҗалыгы ярминкәләре башлана

Ахырда Константин Валентинович шимбәдән гадәткә кергән авыл хуҗалыгы ярминкәләре башланачагын, анда халыкка кулай бәядән җирле җитештерүчеләрнең продукциясе тәкъдим ителәчәген хәбәр итте.

– Аларны әзерләүгә һәм үткәрүгә җәлеп ителгән барлык җаваплы кешеләрнең кушылуын сорыйм, барысы да югары дәрәҗәдә узарга тиеш, – диде ул.