Борис Пастернак иҗаты һәм тормышы турында яңа китап нәшер ителде

Чистайда «Борис Пастернак Чистайда.1941-1943. „Доктор Живаго“ романы чыганакларына» дип исемләнгән китапны тәкъдим иттеләр. Аның авторы — филология фәннәре докторы, профессор, ТР Фәннәр академиясе академигы, РФ һәм ТР атказанган фән эшлек­лесе, Россия язучылар берлеге әгъзасы Наил Вәлиев.
Әдәби очрашуга иҗади интеллигенция вәкилләре, мәктәп укытучылары һәм укучылары, җәмәгать һәм мәдәният учреждениеләре һәм хакимият вәкилләре килгән иде.
–Бүгенге вакыйга шәһәребез өчен зур әһәмияткә ия. «Борис Пастернак. 1941-1943» китабын түземсезлек белән көттек, — дип билгеләп үтте Наил Мансур улы. — Мин Пастернакны өйрәнүне кертү безнең илдә, шулай ук читтәге җирләрдә дә «Доктор Живаго» романының язылу тарихын кабул итүне үзгәртергә тиеш дип ышанам, чөнки нәкъ менә Чистайда әлеге әсәрнең чыганаклары ята. Совет чоры әдәбияты тарихына безнең шәһәргә 200ләп совет әдәбияты эшлеклеләренең килүен кертү бик мөһим, чөнки мондый хәл дөньяның бер җирендә дә күзәтелмәгән. Күптән түгел генә дөнья күргән әлеге китап тиз арада популярлык казанды, аны чит телләргә дә тәрҗемә итү турында тәкъдимнәр дә керә башлады инде.
Әлеге китап өстендә эш дүрт елга сузылды. Ул Борис Пастернак Мемориаль музееның нык­лы хезмәттәшлегендә узды. Озакка сузылган ныклы хезмәт Пастернак иҗатын өйрәнүчеләр һәм укучылар өчен чыганак булырлык тулы кыйммәтле монография булдырырга ярдәм итте.
Әлеге китап совет әдәбияты­ның тарихы, аның 1941-1943 ел­лардагы Чистайдагы, 200ләп совет язучысының гаилә­ләре белән безнең шәһәргә эвакуацияләнгән чоры, тирән чынбарлык, уңдырышлы чын Россия белән беренче тапкыр күзгә күз очрашкан Борис Пас­тернак турында.
Китапның битләрен актарганда кешеләрнең төсле һәм аклы-каралы фотографияләрен, табигать күренешләрен һәм биналарны, шулай ук хатлардан өзекләр күрергә мөмкин.
Шәһәр башлыгы урынбасары Михаил Ксенофонтов авторны һәм укучыларны әлеге китапның дөньяга чыгуы белән тәбрик итте, аның уңай резонанс алачагына ышаныч белдерде.
— Наил Мансур улы, сезнең хезмәтегез өчен зур рәхмәтемне белдерәм. Әлеге китап ярдә­мендә кешеләр Борис Пастернак иҗаты белән тагын да күбрәк кызысынырлар, шулай ук Чистай турында күп кенә кызыклы нәрсәләр белерләр, — диде Михаил Иванович.
Наил Вәлиев үзенең биог­рафия­сенең мөһим этаплары турында, шулай ук фәнни һәм нәшер итү эшчәнлеге турында сөйләде. Иҗади яктан сәләтле балаларга һәм яшьләргә ярдәм итү буенча «Созвездие-Йолдызлык» республика үзәгенең директоры Дмитрий Александрович Тумановның искиткеч чыгышы барлык катнашучылар өчен бүләк булды. Ул Борис Пастернак шигырьләрен укыды.
Талант ияләре Лилия Вәлиева һәм Таһир Мөхәммәтов чыгышлары кичәгә рухи күтәренкелек, ямь өстәделәр.
Тәкъдим итү кичәсендә әлеге китап өчен график портретлар һәм шәһәр пейзажлары галереясын махсус иҗат иткән РФ һәм ТР рәссамнар берлеге әгъзасы Радик Минһаҗев эшләренең күргәзмәсе дә оештырылган иде. Ул очрашуда тәүге тапкыр тәкъдим ителде һәм аны Наил Вәлиев дәүләт музей-тыюлыгына бүләк итте.