Бер ел эчендә Татарстанда 2 меңнән артык хатын-кыз мәҗбүри медицина иминияте буенча ЭКО процедурасын узган

Татарстанда узган ел мәҗбүри медицина иминияте буенча 2 меңнән артык хатын-кыз ЭКО узган. Республикада ЭКО нәтиҗәлелеге 34 процент тәшкил итә. Бу хакта ТР Территориаль мәҗбүри медицина иминияте фонды директоры Алсу Мифтахова ТР Дәүләт Советының 21нче утырышында хәбәр итте.

«Экстракорпораль аталандыруга чыгымнар 2025 елда 309 млн сум тәшкил итте. Барлыгы 503 бала туган, шул исәптән 2024 елның гыйнвар – декабрендә үткәрелгән процедуралардан соң», – дип сөйләде ул.

Утырышта депутатлар 2025 елда Территориаль мәҗбүри медицина иминияте фонды бюджеты үтәлеше турында закон проектын кабул иттеләр. Керемнәр буенча бюджет 93,2 млрд сум тәшкил иткән, чыгымнар буенча – 92,6 млрд сум.

Республика оешмалары тарафыннан Россиянең башка төбәкләрендә яшәүчеләргә күрсәтелгән медицина ярдәме өчен фонд бюджетына 1,1 млрд сум кергән. Салым һәм салым булмаган керемнәр 170,3 млн сум тәшкил иткән.

Россия Федерациясенең башка төбәкләренең территориаль фондларына Татарстан халкына күрсәтелгән медицина ярдәме өчен 1,9 млрд сум җибәрелгән. «Чыгымнарның иң зур үсеше Мәскәү, Удмуртия һәм Башкортостанга туры килә», – дип билгеләде Алсу Мифтахова.

Чыганак: «Татар-информ»