Бакча участогында торак йортны рәсмиләштерергә мөмкинме?

— Бакча участогын карадым, анда торак йорт төзергә телим. Мин аны киләчәктә «бакча амнистиясе» буенча терки алырмынмы?

— Йорт төзи башлаганчы, җир участогының кайсы территориаль зонада урнашканын, шулай ук нинди чикләүләр барлыгын, теге яки бу объектлар өчен нинди параметрлар билгеләнгәнен белергә кирәк. Моның өчен архитектура һәм шәһәр төзелеше идарәсенә (әгәр Казанда булса) яки җир һәм мөлкәти мөнәсәбәтләр палатасына мөрәҗәгать итә һәм шәһәр төзелеше эшчәнлеге турында мәгълүмат системасыннан өземтәгә заказ бирә аласыз. Шулай ук Бердәм дәүләт күчемсез милек реестрыннан киңәйтелгән өземтәгә заказ бирергә мөмкин, ул куллануның махсус шартлары булган ЕГРН зоналары турында барлык мәгълүматларны күрсәтәчәк, алар, үз чиратында, төзелешне тыю һәм билгеле чикләүләр кертә алалар.

— Якын арада фатир сатып алырга уйлыйм. Сатыла торган фатирның нәкъ менә бу кешенеке икәнен ничек тикшерергә, чөнки хәзер күчемсез милек реестрында милекче турында мәгълүмат ябык.

— Сатучыдан Бердәм дәүләт күчемсез милек исемлегеннән өземтәгә заказ бирүен сорагыз. Бу иң гади ысул. Милекче үзе өземтәгә заказ бирә, анда аның барлык мәгълүматлары күренә һәм аны ул милекне сатып алучыга күрсәтә. Кәгазьдәге өземтәгә яки электрон төрдәгесенә заказ бирергә һәм сатып алучыга җибәрергә мөмкин.

Шулай ук сатучы килешү вакытында үз мәгълүматларын ача ала. Моның өчен милекче теләсә нинди уңайлы формада, шул исәптән онлайн, Росреестрга мөрәҗәгать итә һәм ЕГРНга тиешле язма кертә ала. Күчемсез милек хуҗалары тарафыннан шәхси мәгълүматлар турында мәгълүматны ачуга гаризалар күпфункцияле үзәкләр, Росреестр сайты, Бердәм дәүләт хезмәтләре порталы аша бирелергә мөмкин.

Шулай ук нотариуска мөрәҗәгать итәргә мөмкин. Әгәр килешү нотариаль таныклыкны күздә тота, мәсәлән, анда балалар катнаша икән, нотариус үзе Бердәм дәүләт күчемсез милек реестрыннан кирәкле күчермәләрне соратып алачак.

— Минем йортым янында зур булмаган участок бар, мин аны тотып алырга һәм анда теплица урнаштырырга телим. Бу законга каршы килмиме?

— Шуны аңларга кирәк: җир участогыннан законлы файдалану, аны биләү һәм аның белән идарә итү өчен әлеге участокка хокук билгеләүче документ кирәк. Бу дәүләт акты, әлеге җир участогын бүлеп бирү турындагы карар яки башкарма комитет карары, 2001 елның 25 октябренә кадәр җир участогы бирелгән очракта хуҗалык китабыннан өземтә булырга мөмкин. Әгәр сездә бернинди документ булмаса, бу очракта җир участогын бирүне сорап җирле үзидарә органына мөрәҗәгать итәргә кирәк. Җир участогын яки аның бер өлешен үз белдегең белән биләү, шул исәптән аннан хокук билгеләүче документлар булмаган килеш файдалану административ штраф салуга китерә.

Матбугат хезмәте