Ау тыелачак

Октябрьдә Татарстанда БРИКС саммитын уздыруга бәйле рәвештә ауга тулысынча тыю кертеләчәк. Ул кораллы кешеләрнең хәрәкәтен булдырмау өчен 16 октябрьдән 31енә кадәр гамәлдә булачак.

Биоресурслар буенча ТР Дәүләт комитетында хәбәр итүләренчә, ведомство белгечләре Росгвардия һәм хокук саклау органнары белән берлектә даими рәвештә рейдларга чыгачак. Әгәр кагыйдә бозучылар ачыкланса, аларга ау хокукыннан мәхрүм итү яный.

Исегезгә төшерәбез, БРИКС дәүләт башлыклары саммиты Казанда 22 октябрьдән 24енә кадәр узачак. Бу чара 2024 елда БРИКСта Россия рәислегенең төп вакыйгасы булып тора.