Антон Салакаев Чистайда «Рок-берега» фестиваленең ничек узачагы турында сөйләде

«Волга-Волга» фестиваленең сәнгать җитәкчесе һәм «Рок-берега»ны оештыручыларның берсе Антон Салакаев музыкаль фестивальләрнең шәһәрләргә ни өчен кирәк булуы һәм фестиваль хәрәкәте үсеше өчен нәрсә кирәклеге турында сөйләде.

— Антон, августта Чистайга «Рок-берега» килә — шәһәр фестивальне кабул иттеме?

— Проект тормышка ашырылдымы, юкмы, без моны берничә критерий буенча бәялибез. Беренчесе — фестиваль үзе. Узган ел «Рок-берега» беренче тапкыр Чистайда узганда фестивальнең шәһәргә ошавы аңлашылды. Һәрхәлдә, Чистайның үзәк мәйданы дәррәү килде, фестивальне яхшы кабул итте. Кешеләр төркемнәр белән бергә җырладылар, озак таралышырга теләмәделәр — бу безнең өчен бик кадерле.

Икенчесе — фестивальдән соң килгән бәяләмәләр. Интернетка барып җитеп, фестиваль турында нидер язарга теләүчеләр бик күп яхшы сүзләр яздылар һәм фестивальнең шәһәргә чыннан да кирәк булуында бердәм булдылар. Һәм, ниһаять, өченчедән — шәһәр хакимияте безгә «Рок-берега»ны ел саен ясарга сорап мөрәҗәгать итте. Бу формат шәһәргә кызыклы.

— Быел программага кемнәр кертелде?

— Быел состав шактый саллы. Бездә өч хедлайнер бар! Ә «Курчак йорты»н да санасак — фестивальне оештыручыларның берсе буларак, мин аларны Татарстанда гына түгел, ә аннан да читтә әһәмиятле коллектив дип саныйм, бездә алар дүртәү дип әйтергә була.

Фестивальгә «Анимация» — безнең дусларыбыз чакырылды, төркемнең берничә тапкыр «Волга-Волга» фестивалендә катнашканы бар. Быел Чистайга алар шәһәр хакимияте инициативасы белән киләчәкләр, солист Константин Кулясовның алар белән тыгыз бәйләнеше бар. Сәхнәгә тагын безнең иске дусларыбыз — «Мураками» төркеме чыгачак. Әлбәттә, «Волга-Волга» булачак, минем өчен дә Чистай кадерле — ул минем Ватаным.

Фестиваль программасында шулай ук Казанның легендар «Холи», кызыклы һәм шактый нык «Nalien» төркеме булачак. Рок-эшкәртүдә классиканы уйнаучы «Сlever Orchestra»ны көтәбез, «Ветер» булачак. Шулай ук без программага ике Чистай төркемен — яшь егетләрне — «Vis-a-vis» төркемен һәм өлкән буынны — «Respect»ны чакырдык.
Мондый составка күп кенә Идел буе фестивальләре көнләшерлек.

Хәтта аз гына вакыт аралыгында да без һәрвакыт программада яшьләр дә, җирле коллективлар да, хедлайнерларның яхшы составы да булсын өчен тырышабыз.

— Антон, сезнең фикерегезчә, кечкенә шәһәрләргә рок-фестивальләр ни дәрәҗәдә кирәк?

— Зур булмаган шәһәрләр өчен мондый проект батырлыкка тиң. Бу җитди финанс һәм оештыру чыгымнары таләп итә — мондый дәрәҗәдәге фестиваль шактый кыйммәткә төшә. Әмма шуны һәрвакыт әйтәм һәм кабатлыйм: мондый проектлар яшьләр өчен дә, урта буын өчен дә, хәтта өлкәннәр өчен дә кирәк — нәкъ менә шундый иҗади масштаблы проектлар шәһәрне берләштерә.

— Мондый проектлар ничек туа?

— Беренче булып идея туа. Мин дустым һәм партнерым Григорий Корниловка, «Big Twin Music» продюсерына ярдәм итүләре өчен рәхмәтле, шул исәптән бу проект аның белән авторлыкта туган.

Һәм әлбәттә, без барыбыз да аңлыйбыз, мондый дәрәҗәдәге фестиваль үткәрү — билгеле бер бюджет. Өстәвенә, аз түгел. Сәхнә, тавыш, яктылык, фестиваль тирәсендәге PR-кампания һәм тагын бик күп төрле нечкәлекләр шактый җитди финанс чыгымнар таләп итә. Шуңа күрә фестивальне оештыручылар буларак, безгә кешеләргә ошарлык итеп эшләнгән иҗади өлештән тыш, җирле хакимияткә, иганәчеләргә, меценатларга мондый проектның кирәклеген исбатларга туры килә.

«Волга-Волга» фестивале белән дә шул ук хәл. Шәһәрдән шәһәргә йөрибез, һәрвакыт кешеләргә ошый торган шәп иҗади контент алып киләбез һәм һәрвакыт төрле шәһәрләрдә безгә хакимияткә шәһәргә моның кирәклеген һәм кызыклы булуын исбатларга туры килә. Ике линия бергә кушылгач, фестиваль килеп чыга да инде.

— «Волга-Волга» фестивале турында сөйләсәк, проект
ничек үсә? Аны быел көтәргәме?

— Быел фестивальне ачык һавада уздыру мөмкинлеге бар әле. Без «Волга-Волга» фестивален кабул итәргә теләүче партнерлар, иганәчеләр һәм шәһәрләр эзләү белән шөгыльләнәбез.

Без фестивальне Түбән Камада, Алабугада уздырдык, Казанда күп фестивальләр узды — проект шактый саллы, тарихы бик яхшы. Хәтта пандемия вакытында да без шактый күләмле онлайн-фестиваль үткәрә алдык. Шуңа күрә быел да «Волга-Волга» фестивале булачак дип уйлыйм. Ничек кенә булмасын, без аны теге яки бу форматта үткәрә алачакбыз дип уйлыйм. Берничә идея бар, без команда белән хәзер аның өстендә эшлибез.

— Ә гомумән, Татарстанда фестиваль хәрәкәте нинди була алыр иде?

— Татарстанда төрле дәрәҗәдәге фестивальләр шактый күп үткәрелә. Болар — гастро-фестлар да, авыл хуҗалыгы белән бәйле фестивальләр дә, халык иҗаты фестивальләре дә. Һәм теләсә нинди фестиваль, ничек кенә булмасын, программа ахырында бер яки берничә музыкаль төркем чыгыш ясавы белән тәмамлана. Музыкаль өлешсез бер генә фестиваль дә узмый!

Музыкаль фестивальләр исә болардан башка да була ала, әмма без һәрвакыт программаны фуд-корт, мастер-класслар, дегустацияләр, экскурсияләр, күрше мәйданчыкларда музыкантлар эше белән баетырга тырышабыз — бу юлы Чистайда нәкъ шулай булачак. Аларның кайберләренә, шул исәптән иң әһәмиятлеләренә, «Волга-Волга» студиясенең «Big Twin Music» проекты белән берлектә катнашы булуына мин бик шат. Бездә аларның кирәклегенә бернинди шик юк.

Барыгызны да 18 августта, Чистайның үзәк мәйданында «Рок-берега» фестиваленә көтеп калабыз. Керү ирекле.

Бу көнне Чистайда туристлар һәм шәһәр халкы өчен тарихи үзәк буенча автобус экскурсияләре оештырылачак, җирле музейларга бару өчен сертификатлар уйнатылачак, алар фестиваль көнне 12дән 20 сәгатькә кадәр эшләячәк. Мәйданда интерактив мәйданчыклар, балалар өчен күңел ачу зонасы, фудкорт булачак, эчемлекләрне дегустацияләү узачак. Иң матур образга яки гадәти булмаган костюмга конкурслар һәм бүләкләр уйнату булачак.