Акчасыз калган: пенсионер ханым мошенникларга миллион ярым сумнан артык акча күчергән

Россия Эчке эшләр министрлыгының Чистай районы буенча бүлегенең кизү частенә Каргалы авылында яшәүче 63 яшьлек хатын-кыз мошенниклык турында гариза белән мөрәҗәгать иткән. Тикшерүчегә ул элек эшләгән эш урыныннан хезмәткәрләрнең шәхси мәгълүматлары таралуы турында смс-хәбәр килүен аңлаткан.
— Берничә минуттан аңа таныш булган кеше шалтыраткан, үзен тикшерү бүлеге хезмәткәре дип таныштырган, мошенниклар аның шәхси кабинетына керергә омтылалар дип хәбәр иткән, — дип аңлаттылар матбугат хезмәтендә. — Мошенник аның тупланмалары булуы белән кызыксынган. Пенсионер ханым аның зур суммада кертемнәре булуын хәбәр иткән. Шалтыратучы хатын-кызны куркыта башлаган, мошенникларда аның барлык счетларына керү мөмкинлеге барлыкка килүен һәм аларның тупланмалардан файдалана алуын әйткән. Ул аны бөтен акчаны ашыгыч рәвештә «куркынычсыз счетка» күчерергә кирәклегенә ышандырган. Әмма акчаны нигезле сәбәп буенча гына алырга мөмкин булуы турында ачыкланган. Шалтыратучы банкта акча йорт сатып алу өчен кирәк дип ялганларга киңәш иткән һәм үзе аңа йорт сатып алу-сату буенча ялган килешү әзерләгән.
Банкта ялган килешү ярдәмендә пенсионер ханым шалтыратучы күрсәткән реквизитлар буенча үз кертеменнән 1 400 000 сум күчергән. Счетта әле 244 000 сум калган булган. Аларны да хатын-кыз алып, мошенникларга банкомат аша күчергән.
Эчке эшләр министрлыгы матбугат хезмәтендә хәбәр итүләренчә, мошенниклык факты буенча җинаять эше кузгатылган.
Эчке эшләр министрлыгы хезмәткәрләре халыкны таныш булмаган кешеләр белән телефоннан сөйләшмәскә, үзләренең шәхси мәгълүматларын, бигрәк тә акча турында сүз чыкса, беркемгә дә хәбәр итмәскә чакыралар.