4 көн эчендә шәһәр урамнарыннан 1100 кубометр кар чыгарылган

Чистай районы башлыгы социаль челтәрдәге битендә халыкка мөрәҗәгать итте һәм тәүлек буе алып барыла торган масштаблы эш турында җентекләп сөйләде.

– Узган ялларда кар явудан туктамады һәм хәзер без, юлларда имин һәм уңайлы хәрәкәт итүне тәэмин итү өчен, көчәйтелгән режимда эшләвебезне дәвам итәбез, – дип хәбәр итте Дмитрий Алексеевич. – Тротуарларны, җәмәгать транспорты тукталышларын һәм җәяүлеләр зоналарын чистартуга аерым игътибар бирелә. Юл өслегенең торышына өзлексез мониторинг алып барыла.

Район башлыгы барысын да үзара аңлашуга һәм сак булырга чакырды.

– Хәтта чистартылган юлларда да бозлавык булуы ихтимал, шуңа күрә юл хәрәкәте һәм тизлек режимы кагыйдәләрен үтәү аеруча мөһим, – диде ул.

Район башлыгы автомобиль хуҗаларына, кар җыю техникасы эшенә комачауламас өчен, машиналарын юл кырыена куймауларын сорап мөрәҗәгать итте.

– Игътибарлы булыгыз һәм үзегезне саклагыз! – диде Дмитрий Алексеевич.

14 декабрьдән 17сенә кадәр шәһәр урамнарыннан 1100 кубометр кар чыгарылган.

Ленин урамының үзәген җыештыру уңайлы булсын өчен төнлә автомобильләрне кую өчен чикләүләр каралган – транспорт чараларын кичке 22 сәгатьтән иртәнге 7 сәгатькә кадәр кую тыела, бу хакта Ленин урамында урнаштырылган яңа юл билгеләре сөйли.

Фото Горисполком