Яшь пациентларга «Мобиль ярдәм» күрсәттеләр

Тар белгечләргә кабул итүгә әти-әниләре белән бергә сә­ла­мәтлек мөмкинлекләре чик­ләнгән балалар чакырылды. Яшь пациентларны невролог, эпилептолог, психиатр, логопед-дефектолог (рәсемдә), клиник психолог һәм функциональ диагностика табибы тикшерделәр. Алар барысы да - «Балаларда көч» хәйрия фондының тернәкләндерү үзәге белгечләре, әлеге чараны да «Мобиль ярдәм» проекты кысаларында оештырганнар.

– Безнең тернәклән­дерү үзәк­­ләре Казан һәм Түбән Кама шәһәрләрендә генә бар, әмма республиканың башка район­нарыннан да балалар белгечләребезнең квалифика­цияле ярдәмен ала алуларын телим. Безнең үзәктә Чистайдан яшь пациентлар еш була, сәламәтлек мөмкинлекләре чикләнгән балаларның әти-әниләре үтенече буенча без сезнең районга килдек, – ди «Балаларда көч» хәйрия фонды  директоры урынбасары Нина Коваленко.

Белгечләр балалар һәм аларның әти-әниләре белән берничә сәгать дәвамында аралаштылар. 58 диагностика һәм консультатив кабул итү үткәрелде, һәр пациент өчен индивидуаль тернәкләнү маршрутлары эшләнде, тикшерү узган балалар фондның тернәкләндерү үзәкләрендә курслар узарга чакыру алдылар.

– Без балаларыбыз янына килгән­нәре өчен коллегаларыбызга бик рәхмәтлебез. Бу яшь пациентларга тирәнрәк тикшеренергә, дәвалау курсына төзәтмәләр кертергә ярдәм итәчәк. Югары квалификацияле белгечләрнең килүе, һичшиксез, диаг­нозны вакытында кую өчен дә ярдәм итә, – дип билгеләп үтте балалар дәваханәсенең мәктәп-мәктәпкәчә бүлеге мөдире Светлана Проничева. 

Кирәкле һәм мөһим чараны фонд «Татарстан – яңа гасыр» респуб­лика иҗтимагый хәрәкәтенең югары советы башкарма комитеты рәисе Алсу Тарханова һәм Казан ачык талантлар университеты белән берлектә оештырды. Нәкъ менә алар бу көнне күрү белән проблемалары булган балаларга «Һөнәрләр атлас»ы дигән модульле уен үткәрделәр. Уен формасында малайлар һәм кызлар белем алырга һәм беренче капитал эшләргә тырыштылар.

– Шулай итеп, без балаларга һөнә­ри юнәлеш бирүдә ярдәм итәбез, әлбәттә, моны аларның сәламәтлек үзенчәлекләрен исәпкә алып эшлибез. Бу уен малайларның һәм кызларның потенциалын ачарга һәм шәхси үсеш планын билгеләргә ярдәм итә. Әйтергә кирәк, балалар уенда бик теләп катнашалар, әти-әниләрен җәлеп иткән очраклар да булгалый, – дип билгеләп үтә Алсу Тарханова.

Табиблар кабул итүе һәм һөнәри юнәлеш уеннары арасындагы тәнә­фестә теләгән һәркем мастер-класс­та катнаша алды. Биредә укучылар үз куллары белән сабын ясадылар һәм ярмадан яки пластилиннан рәсемнәр төзеделәр. Ә аларга бу эштә «Татарстан-яңа гасыр» хәрәкәте волонтерлары ярдәм иттеләр.